ശ്രീരാമ ക്ഷേത്രത്തിൽ അതിക്രമിച്ച് കയറി നിസ്കാരം ! സഹോദരന്മാരായ 3 മുസ്ലിം വയോധികന്മാർക്കെതിരെ കേസ്

ഷാജാപൂർ : ശ്രീരാമ ക്ഷേത്രത്തിൽ അതിക്രമിച്ചു കയറി നിസ്കരിച്ച സഹോദരന്മാരായ 3 മുസ്ലിം വയോധികന്മാർക്കെതിരെ പോലീസ് കേസെടുത്തു. മധ്യപ്രദേശിലെ കിലോഡ ഗ്രാമത്തിലെ ശ്രീരാമക്ഷേത്രത്തിലാണ് മുസ്ലീം സഹോദരന്മാരായ റുസ്തം (65), അക്ബർ (85), ബാബു ഖാൻ (70) എന്നിവർ അതിക്രമിച്ച് കയറി നിസ്കാരം നടത്തിയത്.

പ്രതികൾക്കെതിരെ കേസെടുത്ത പോലീസ് ഇവരെ കസ്റ്റഡിയിലെടുത്തെങ്കിലും പിന്നീട് വിട്ടയച്ചു. ഹിന്ദു മതവികാരം വ്രണപ്പെടുത്താനുള്ള ബോധപൂർവമായ ശ്രമമാണ് ഇവർ നടത്തിയതെന്നും മൂവർക്കുമെതിരെ കർശന നടപടി വേണമെന്നും ആവശ്യപ്പെട്ട് പ്രാദേശിക ഹിന്ദു സമൂഹം പരാതി നൽകി.

മൂന്ന് പേരും ബാങ്കിലെ ജോലി ഇടപാടുകൾ കഴിഞ്ഞ് വീട്ടിലേക്ക് മടങ്ങവേയാണ് അതിക്രമം നടത്തിയതെന്നാണ് പോലീസ് നൽകുന്ന വിവരം. നമസ്‌കാരത്തിന് സമയമായെന്ന് പറഞ്ഞാണ് ഇവർ ക്ഷേത്രത്തിലേക്ക് കടന്നത്. അക്ബറും റുസ്തവും ബാബു ഖാനും വൈകുന്നേരം 5.45ഓടെ ക്ഷേത്രത്തിൽ എത്തിയിരുന്നതായി പൂജാരി ഓം പ്രകാശ് പറഞ്ഞു. ക്ഷേത്രവളപ്പിലെ മൺകുടത്തിൽ സൂക്ഷിച്ചിരുന്ന വെള്ളം കൊണ്ട് കൈകാലുകൾ കഴുകിയ ശേഷം മൂന്നുപേരും അവിടെ ഇരുന്നു നിസ്കാരം തുടങ്ങി. ഭക്തർ ഇതിനെ എതിർത്തെങ്കിലും അവരെ വെല്ലുവിളിച്ച് 20 മിനിറ്റോളം പ്രതികൾ നിസ്കാരം നടത്തി .

നാട്ടുകാർ അറിയിച്ചതിനെത്തുടർന്ന് സ്ഥലത്തെത്തിയ പോലീസ് ഉടൻ നടപടി സ്വീകരിക്കുകയും ഇവരെ കസ്റ്റഡിയിലെടുക്കുകയും ചെയ്തു.ചോദ്യം ചെയ്യലിൽ മൂന്ന് പ്രതികളും തെറ്റ് സമ്മതിച്ചു. പോലീസ് നോട്ടീസ് നൽകി ഇവരെ വിട്ടയച്ചു. കേസിൽ തുടർ അന്വേഷണങ്ങളും നിയമ നടപടികളും പുരോഗമിക്കുകയാണ്.