കേരളത്തിലെ ട്രോളിങ് നിരോധനം മുതലെടുക്കാൻ പഴകിയതും പുഴുവരിച്ചതുമായ ഒഡീഷാ മൽസ്യം വിപണിയിൽ; സംസ്ഥാനത്ത് എത്തുന്നത് ട്രെയിൻ മാർഗ്ഗം; തൃശ്ശൂരിൽ 36 പെട്ടി പുഴുവരിച്ച മൽസ്യം പിടികൂടി

തൃശൂര്‍: റെയില്‍വേ സ്‌റ്റേഷനില്‍ നിന്നും പഴകിയ മത്സ്യം പിടികൂടി. 15 ബോക്‌സുകളില്‍ ഐസ് ഇട്ട പച്ചമീനും 21 ബോക്‌സുകളിലായി പുഴുവരിച്ച ഉണക്കമീനുമാണ് ഭക്ഷ്യ സുരക്ഷാ വകുപ്പ് പിടിച്ചെടുത്തത്. പുഴുവരിച്ച പാഴ്‌സലുകള്‍ ഇന്നലെ വൈകീട്ടാണ് ഒഡീഷയില്‍നിന്നും തൃശൂര്‍ റെയില്‍വേ പ്ലാറ്റ്‌ഫോമില്‍ എത്തിയതെന്നാണ് വിവരം.

ഇന്ന് രാവിലെ റെയില്‍വേ സ്റ്റേഷന് പുറത്തുവച്ച് ഭക്ഷ്യസുരക്ഷാവിഭാഗം പഴകിയ മീന്‍ അടങ്ങിയ പെട്ടികള്‍ പിടിച്ചെടുത്തു. പരിശോധന നടക്കുന്നതിനിടെ ഒരു വാഹനത്തില്‍ ഉടമസ്ഥന്‍മാര്‍ മീന്‍ ബോക്‌സ് കടത്തി ശക്തന്‍ മാര്‍ക്കറ്റിലെത്തിച്ചെങ്കിലും പൊലീസ് പിടിച്ചെടുത്ത് ഭക്ഷ്യസുരക്ഷാവിഭാഗത്തിന് കൈമാറി. പതിനഞ്ച് മണിക്കൂറിലേറെ നേരമാണ് ഉടമകള്‍ എത്താത്തതിനെ തുടര്‍ന്ന് പഴകിയ മത്സ്യം റെയില്‍വേ പ്ലാറ്റ് ഫോമില്‍ കിടന്നത്.