സര്‍ട്ടിഫിക്കറ്റ് നൽകിയത് വിദേശത്തുള്ള സുഹൃത്ത്; ഇത് കേരളത്തിൽ കൊടുത്താൽ പ്രശ്നമൊന്നുമുണ്ടാകില്ല; വ്യാജ സർട്ടിഫിക്കറ്റ് കേസിൽ പ്രതി നിഖിലിന്റെ മൊഴിയെടുത്ത് പോലീസ്

കൊല്ലം: വ്യാജ സർട്ടിഫിക്കറ്റ് കേസിൽ പ്രതി നിഖിലിന്റെ മൊഴിയെടുത്ത് പോലീസ്. കലിംഗ സര്‍വകലാശാലയുടെ സര്‍ട്ടിഫിക്കറ്റ് തനിക്ക് നല്‍കിയത് വിദേശത്തുള്ള സുഹൃത്താണെന്നും ഇത് കേരളത്തിൽ കൊടുത്താൽ പ്രശ്നമുണ്ടാകില്ലെന്നും സുഹൃത്ത് പറഞ്ഞെന്നും ഇതനുസരിച്ചാണ് താൻ സർട്ടിഫിക്കറ്റ് നൽകിയതെന്നും നിഖിൽ വ്യക്തമാക്കി. മുന്‍ എസ്എഫ്‌ഐ നേതാവായ സുഹൃത്ത് കായംകുളത്ത് വിദ്യാഭ്യാസ ഏജന്‍സി നടത്തിയിരുന്നുവെന്നും നിഖില്‍ പറഞ്ഞു. നിഖില്‍ തോമസിനെ പോലീസ് ചോദ്യംചെയ്യുന്നത് തുടരുകയാണ്.

വ്യാജ സര്‍ട്ടിഫിക്കറ്റിനായി ഇയാള്‍ക്ക് നിഖില്‍ 2 ലക്ഷം രൂപ കൈമാറിയതായി പൊലീസിനു നേരത്തെതന്നെ തെളിവ് ലഭിച്ചിരുന്നു. എസ്എഫ്‌ഐ കായംകുളം ഏരിയ പ്രസിഡന്റായിരുന്ന ഇയാള്‍ ഇപ്പോള്‍ വിദേശത്ത് അദ്ധ്യാപകനാണ്. 2020 ല്‍ നിഖിലിന്റെ ബാങ്ക് അക്കൗണ്ടില്‍നിന്ന് ഇയാളുടെ അക്കൗണ്ടിലേക്ക് 2 ലക്ഷം രൂപ അയച്ചതായി കണ്ടെത്തിയിരുന്നു.നേരത്തേ വിവിധ സര്‍വകലാശാലകളില്‍ പ്രവേശനം നേടാന്‍ വിദ്യാര്‍ഥികളെ സഹായിക്കുന്ന ഏജന്‍സി നടത്തിയിരുന്ന ഇയാള്‍ പലര്‍ക്കും വ്യാജ സര്‍ട്ടിഫിക്കറ്റുകള്‍ സംഘടിപ്പിച്ചു നല്‍കിയതായി പൊലീസ് സംശയിക്കുന്നു. ഇയാളെ നാട്ടിലെത്തിച്ചു ചോദ്യം ചെയ്യാനുള്ള ശ്രമങ്ങളും പൊലീസ് തുടങ്ങിയിട്ടുണ്ടെന്നാണ് വിവരം.