കീവ്: റഷ്യൻ – യുക്രൈൻ യുദ്ധം മുറുകുകയാണ്. യുദ്ധം തുടങ്ങി ഇന്ന് നാലാം ദിനമാണ്. റിവ്നെയിലും വൊളൈനിലും വ്യോമാക്രമണ സാധ്യതയുണ്ടെന്ന മുന്നറിയിപ്പ് ലഭിച്ചിട്ടുണ്ട്. റഷ്യന് സൈനിക മുന്നേറ്റം തടയാനുള്ള ശ്രമത്തിന്റെ ഭാഗമായി 37 ,000 പൊതുജനങ്ങളെ യുക്രൈന് പട്ടാളത്തിന്റെ ഭാഗമാക്കിയിരിക്കുകയാണ്. പൗരന്മാരെ കരുതല് സേനയുടെ ഭാഗമാക്കി പോരിനൊരുക്കുകയാണ് യുക്രൈന്. ഒഡേസയില് യുക്രൈന് വ്യോമകേന്ദ്രം സജ്ജമാക്കിയിട്ടുണ്ട്. വ്യോമപ്രതിരോധ സംവിധാനം പ്രവര്ത്തനക്ഷമമായെന്ന് യുക്രൈന് അവകാശപ്പെട്ടു.
അതേസമയം, യുക്രൈനിലെ കീവിലും കാര്കീവിലും ഉഗ്രസ്ഫോടനങ്ങള് നടത്തി റഷ്യ. ജനവാസ കേന്ദ്രങ്ങളിലും സൈന്യം ആക്രമണം നടത്തുകയാണ്. ജനവാസ കേന്ദ്രത്തിൽ ആക്രമണം നടത്തില്ല എന്നാണ് റഷ്യ പറഞ്ഞിരുന്നത്.
കാർകീവിലെ അപ്പാർട്ട്മെന്റിന് നേരെ സൈന്യം വെടിയുതിര്ത്തതായും ഇതില് ഒരു സ്ത്രീ കൊല്ലപ്പെട്ടതായുമാണ് ഇപ്പോൾ പുറത്തുവരുന്ന വിവരം. ഒന്പത് നില കെട്ടിടത്തിന് നേരെയാണ് വെടിവെപ്പുണ്ടായത്. ശനിയാഴ്ച്ച രാത്രി മുതൽ കാർകീവിൽ കനത്ത വെടിവപ്പാണ് നടക്കുന്നത്.
ജനം ബങ്കറുകളിലും മെട്രോ സബ്വേകളിലും അഭയം തേടുന്നതിനാൽ ആൾ അപായം കുറവാണ്.
നാട്ടുകാരിൽ നിന്ന് ആയുധങ്ങൾ തിരികെ വാങ്ങണണമെന്ന് യുക്രൈനോട് റഷ്യ ആവശ്യപ്പെട്ടിരുന്നു. അല്ലെങ്കിൽ ഭവിഷ്യത്ത് ഏറെയായിരിക്കുമെന്നും റഷ്യ മുന്നറിയിപ്പ് നൽകിയിരുന്നു.
