എംഡിഎംഎ മയക്കുമരുന്നും, കഞ്ചാവും കടത്താൻ ശ്രമം; സ്ത്രീ ഉൾപ്പെടെയുള്ള അഞ്ചംഗ സംഘം പിടിയില്‍

കുമളി: എംഡിഎംഎ മയക്കുമരുന്നടക്കം (MDMA Seized) കൈയ്യില്‍ വച്ച അഞ്ചംഗ സംഘം പിടിയില്‍. ബെംഗളൂരുവിൽ നിന്നും എംഡിഎംഎ മയക്കുമരുന്നും കഞ്ചാവുമായി എത്തിയ സ്ത്രീ ഉൾപ്പെടെയുള്ള അഞ്ചംഗ സംഘമാണ് പിടിയിലായത്. ഇടുക്കി വണ്ടിപ്പെരിയാറിനു സമീപത്തു വച്ചാണ് ഇവരെ എക്സൈസ് പിടികൂടിയത്.

കുമളി അതിർത്തി ചെക്ക് പോസ്റ്റിൽ പരിശോധനക്കായി കൈകാണിച്ചിട്ടും വാഹനം നിർത്താതെ പോയ സംഘത്തെ പിന്തുടർന്നാണ് പിടികൂടിയത്. തിരുവനന്തപുരം സ്വദേശികളായ ഡൈന, വിജേഷ്, നിതീഷ്, കിരൺ, പ്രകോഷ് എന്നിവരാണ് പിടിയിലായത്. ഇവരുടെ പക്കൽ നിന്നും രണ്ടര ഗ്രാം എംഡിഎംഎയും 100 ഗ്രാം കഞ്ചാവും പിടികൂടി.

അതേസമയം ഇവർ സഞ്ചരിച്ച വാഹനം അറുപത്തി മൂന്നാം മൈലിലെ പെട്രോൾ പമ്പിൽ ഇടിച്ചു കയറ്റി തിരിക്കാൻ ശ്രമിച്ചതിനെ തുടർന്ന് ടയർ പഞ്ചറായി. ഈ വാഹനവും കസ്റ്റഡിയിലെടുത്തു. ബെംഗളൂരുവിൽ നിന്നാണ് എംഡിഎംഎ വാങ്ങിയതെന്നാണ് സംഘാംഗങ്ങൾ മൊഴി നൽകിയത്.