ഡിഗ്രി പഠിച്ചുതീർക്കാൻ 54 വർഷമെടുത്ത് 71 വയസുകാരൻ;ഗിന്നസ് റെക്കോർഡോടെ ബിരുദം കരസ്ഥമാക്കി ആർതർ റോസ്

ഡിഗ്രി പഠിച്ചുതീർക്കാൻ 54 വർഷമെടുത്ത് 71 വയസുകാരൻ. അമേരിക്കൻ സ്വദേശിയായ ആർതർ റോസാണ് യൂണിവേഴ്സിറ്റി ഓഫ് ബ്രിട്ടീഷ് കൊളംബിയയിൽ നിന്ന് 54 വർഷമെടുത്ത് ബിരുദ സർട്ടിഫിക്കറ്റ് നേടിയത്. അതേസമയം 54 വർഷം കൊണ്ട് ഡിഗ്രി പൂർത്തിയാക്കിയ ആർതർ ഗിന്നസ് ബുക്കിലും ഇടം നേടി. ഏറ്റവും കൂടുതൽ സമയമെടുത്ത് ബിരുദം പൂർത്തിയാക്കിയ ആളെന്ന റെക്കോർഡാണ് ആർതർ സ്വന്തമാക്കിയിരിക്കുന്നത്.

ഇതിലൂടെ 52 വർഷം കൊണ്ട് ബിരുദം പൂർത്തിയാക്കിയ റോബർട്ട് എഫ്പി ക്രോണിന്റെ റെക്കോർഡാണ് ആർതർ റോസ് മറികടന്നത്. ആർതർ റോസ് ബിരുദ പഠനം ആരംഭിച്ചത് 1969ലായിരുന്നു. എന്നാൽ അപ്പോൾ അഭിനയമോഹം തലയ്ക്കുപിടിച്ച് ചില നാടകങ്ങളിൽ ആർതർ അഭിനയിച്ചു. തുടർന്ന് 2 വർഷത്തെ ബിരുദപഠനം പാതിക്ക് നിർത്തിയ ആർതർ മോൺട്രിയാലിലേക്ക് നീങ്ങി നാടക സ്കൂളിൽ ചേർന്നു. എന്നാൽ കുറച്ചുകഴിഞ്ഞപ്പോൾ അതും ആർതറിന് മടുത്തു. എന്നിട്ടും ബിരുദം പൂർത്തിയാക്കാനല്ല ആർതർ പോയത്. മറിച്ച് നിയമം പഠിക്കാനായിരുന്നു. അങ്ങനെ ടൊറൻടോ ലോ സ്കൂളിൽ നിന്ന് ആർതർ നിയമം പഠിച്ചു. 35 വർഷത്തോളം അഭിഭാഷകനായി ജോലി ചെയ്ത ആർതർ 2016ൽ വിരമിച്ചു. തുടർന്നാണ് ബിരുദപഠനം പൂർത്തിയാക്കാൻ ആർതർ തീരുമാനിച്ചത്.