900 പോലീസ്‌കാർക്ക് പിന്നാലെ ഇപ്പോൾ ആദ്ധ്യാപകരും; ബംഗ്ലാദേശിൽ ന്യൂനപക്ഷ വിഭാഗങ്ങളെ ജോലിയിൽ നിന്നും രാജിവെയ്ക്കാൻ നിർബന്ധിതരാക്കി ഇസ്ലാമിസ്റ്റുകൾ.

ധാക്ക: ബംഗ്ലാദേശ് പ്രധാനമന്ത്രി ഷെയ്ഖ് ഹസീനയുടെ രാജിക്ക് പിന്നാലെ ഹിന്ദു സമൂഹത്തിനെതിരായ അതിക്രമങ്ങളിൽ വർദ്ധനവുണ്ടായതായി റിപ്പോർട്ടുകൾ. നേരിട്ടുള്ള ആക്രമണങ്ങൾക്കു പുറമെ, സാമൂഹിക ബഹിഷ്കരണവും അപവാദ പ്രചരണങ്ങളും ഹിന്ദുക്കൾ നേരിടേണ്ടിവരുന്നുണ്ട്.

ഷെയ്ഖ് ഹസീനയുടെ ഭരണ പതനത്തെത്തുടർന്ന് മുഹമ്മദ് യൂനിസ് നേതൃത്വം നൽകുന്ന ഇടക്കാല സർക്കാർ അധികാരത്തിൽ വന്നതോടെ മതമൗലികവാദ ഗ്രൂപ്പുകൾ ശക്തിപ്പെടുകയും മതന്യൂനപക്ഷങ്ങൾക്കെതിരായ അക്രമങ്ങളും വിവേചനങ്ങളും ഉയരുകയും ചെയ്തതായി സൂചനകളുണ്ട്.

ഹിന്ദു വിരുദ്ധ നീക്കങ്ങളുടെ ഭാഗമായുള്ള ഈ അതിക്രമങ്ങൾ ഹിന്ദുക്കളുടെ അനധികൃത പിരിച്ചുവിടലിനും നിർബന്ധിത രാജിവെയ്പ്പിനും കാരണമാകുന്നു. പ്രത്യേകിച്ച്, സർക്കാർ ജോലികളിലും സർവകലാശാലകളിലും ജോലി ചെയ്യുന്ന ഹിന്ദു അദ്ധ്യാപകർക്ക് രാജിവെക്കാൻ സമ്മർദ്ദം നേരിടേണ്ടിവരുന്നു. തങ്ങളുടെ ജോലിയും മറ്റ് അവസരങ്ങളും നഷ്ടപ്പെടുത്തുന്ന, ശത്രുതയുടെ അന്തരീക്ഷം കെട്ടിപ്പടുക്കുകയാണെന്ന് ഹിന്ദു സമൂഹം പറയുന്നു.

തൊഴിൽ മേഖലയിൽനിന്നുമുള്ള വിവേചനത്തിന് പുറമെ, ഇന്ത്യയിലെ ‘ലവ് ജിഹാദിന്’ സമാനമായ ഒരു കാമ്പെയ്ൻ ഹിന്ദു പുരുഷന്മാർക്കെതിരെയും നടക്കുന്നു. ഹിന്ദു പുരുഷന്മാർ മുസ്ലീം സ്ത്രീകളെ പ്രലോഭിപ്പിച്ച് മതപരിവർത്തനം നടത്തുന്നതായി ആരോപിച്ച് തീവ്രവാദ ഗ്രൂപ്പുകൾ ‘ലവ് ട്രാപ്പ്’ എന്ന പേരിൽ ഒരു കാമ്പെയ്ൻ ആരംഭിച്ചിട്ടുണ്ട്. മുസ്ലീം സ്ത്രീകൾ ജാഗ്രത പാലിക്കണമെന്ന സന്ദേശം ഉൾക്കൊള്ളുന്ന പോസ്റ്ററുകൾ പല പ്രദേശങ്ങളിലും പ്രത്യക്ഷപ്പെട്ടിട്ടുണ്ട്. ഇതിന് പുറമെ, ദുർഗ്ഗാ പൂജാ ദിവസങ്ങളിൽ ബംഗ്ലാദേശിന്റെ വിവിധ പ്രദേശങ്ങളിൽ ഹിന്ദു വിഗ്രഹങ്ങൾ നശിപ്പിക്കപ്പെട്ട സംഭവങ്ങളും റിപ്പോർട്ട് ചെയ്യപ്പെട്ടിട്ടുണ്ട്