ധീരജിന്റെ കൊലപാതകം: കെഎസ്യു ഇടുക്കി ജില്ലാ ജനറല് സെക്രട്ടറി അറസ്റ്റില്; കേസിൽ പിടിയിലായവരുടെ എണ്ണം 6 ആയി
ഇടുക്കി എഞ്ചിനീയറിംഗ് കോളജിൽ കുത്തേറ്റ് കൊല്ലപ്പെട്ട എസ് എഫ് ഐ പ്രവർത്തകൻ ധീരജിന്റെ കൊലപാതകത്തിൽ ഒരാൾ കൂടി പിടിയിൽ. കെഎസ്യു ഇടുക്കി ജില്ലാ ജനറല് സെക്രട്ടറി നിതിന് ലൂക്കോസാണ് പോലീസ് പിടിയിലായത്.
ഇതോടെ കേസില് പിടിയിലായവരുടെ എണ്ണം ആറായി. നേരത്തെ കേസില് അറസ്റ്റിലായിരുന്ന യൂത്ത് കോൺഗ്രസ് പ്രവർത്തകൻ നിഖിൽ പൈലിയും ഇയാൾക്കൊപ്പം ഉണ്ടായിരുന്ന ജെറിൻ ജോജോ എന്നിവർ നിലവില് റിമാന്ഡിലാണ്. പത്തു ദിവസത്തേക്ക് ഇവരെ കസ്റ്റഡിയില് വിട്ടുകിട്ടണമെന്നാവശ്യപ്പെട്ട് പൊലീസ് കോടതിയെ സമീപിച്ചിട്ടുണ്ട്.
അതേസമയം കൊലക്ക് ഉപയോഗിച്ച ആയുധം കണ്ടെത്തുന്നതിനും സംഭവ സ്ഥലത്തെത്തിച്ച് തെളിവെടുപ്പ് പൂര്ത്തിയാക്കുന്നതിനും കൂടുതല് അന്വേഷണങ്ങള്ക്കുമായാണ് കസ്റ്റഡിയില് ആവശ്യപ്പെട്ടിരിക്കുന്നത്. ഇടുക്കി ഡിവൈഎസ്പി ഇമ്മാനുവല് പോളിന്റെ നേതൃത്വത്തിലുള്ള സംഘമാണ് അന്വേഷണം നടത്തുന്നത്.
