ദില്ലി: ഇന്ത്യയിലെ ആദ്യത്തെ അതിവേഗ ട്രെയിന് പുറത്തിറക്കി നാഷണല് ക്യാപിറ്റല് റീജിയന് ട്രാന്സ്പോര്ട്ട് കോര്പ്പറേഷന്. ദില്ലിക്കും മീററ്റിനും ഇടയില് പ്രവര്ത്തനം നടത്താന് പോകുന്ന അതിവേഗ ട്രെയിനാണ് പുറത്തിറക്കിയത്.
അതേസമയം ഇരുനഗരങ്ങളും തമ്മിലുളള 82 കിലോമീറ്റര് ദൂരം പിന്നിടാന് വെറും 55 മിനിറ്റ് മാത്രമേ എടുക്കൂ. ദില്ലി-ഗാസിയാബാദ്-മീററ്റ് ആര്ആര്ടിഎസ് ഇടനാഴിയുടെ മുന്ഗണനാ വിഭാഗത്തില് ട്രയല് റണ് ഈ വര്ഷം ആരംഭിക്കുമെന്ന് പ്രതീക്ഷിക്കുന്നതായി അധികൃതര് അറിയിച്ചു.
കൂടാതെ 180 കിലോമീറ്റര് വേഗതയുള്ള ട്രെയിനുകള് യാത്രകാര്ക്ക് ഓരോ 5-10 മിനിറ്റിലും ലഭ്യമാകും. ഇതിനൊപ്പം 14 സ്റ്റോപ്പുകളോടെ ദില്ലിക്കും മീററ്റിനും ഇടയിലുള്ള ദൂരം 55 മിനിറ്റിനുള്ളില് മറികടക്കും.
ദുഹായ്, മോദിപുരം എന്നിവിടങ്ങളിലെ രണ്ട് ഡിപ്പോകളും ജംഗ്പുരയില് ഒരു സ്റ്റേബിളിംഗ് യാര്ഡും ഉള്പ്പെടെ 25 സ്റ്റേഷനുകളുണ്ടാകും. 82 കിലോമീറ്റര് ദൈര്ഘ്യമുള്ള ദില്ലി-ഗാസിയാബാദ്-മീററ്റ് ആര്ആര്ടിഎസ് ഇടനാഴിയുടെ പണി അതിവേഗം പുരോഗമിക്കുകയാണ്. എലിവേറ്റഡ് വിഭാഗത്തിന്റെ അടിസ്ഥാന ജോലിയുടെ 80 ശതമാനത്തോളം എന്സിആര്ടിസി പൂര്ത്തിയാക്കി.
