വയനാട്: മേപ്പാടിയില് കഴിഞ്ഞ ബുധനാഴ്ച സ്വകാര്യ റിസോര്ട്ടിന് നേരെയുണ്ടായ ആക്രമണത്തിന്റെ ഉത്തരവാദിത്വം ഏറ്റെടുത്ത് മാവോയിസ്റ്റ് നാടുകാണി ഏരിയാ കമ്മറ്റി. റിസോര്ട്ട് അധികൃതരും താമസക്കാരും പ്രദേശത്തെ ആദിവാസി സ്ത്രീകളോട് മോശമായി പെരുമാറിയതിനുള്ള പ്രതികാരമായാണ് അട്ടമലയിലെ ലെഗസി ഹോംസ് റിസോര്ട്ടിന് നേരെയുള്ള ആക്രമണമെന്ന് വ്യക്തമാക്കിക്കൊണ്ട് മാവോയിസ്റ്റ് ഏരിയാ കമ്മിറ്റി പുറത്തിറക്കിയ വാര്ത്താക്കുറിപ്പ് വയനാട് പ്രസ് ക്ലബ്ബില് കിട്ടി.
ആദിവാസി സ്ത്രീകളെ കാഴ്ചവസ്തുക്കളാക്കുന്നവര്ക്കുള്ള താക്കീതാണ് ആക്രമണമെന്നും കുറിപ്പിലുണ്ട്. ആദിവാസികളുടെ സൈ്വര്യജീവിതത്തിന് തടസ്സം നില്ക്കുന്ന മുഴുവന് റിസോര്ട്ട് മാഫിയയെയും പ്രദേശത്തുനിന്ന് അടിച്ചോടിക്കാന് ജനങ്ങള് രംഗത്തിറങ്ങണമെന്നും നാടുകാണി ഏരിയ കമ്മറ്റി വക്താവ് അജിതയുടെ പേരിലിറക്കിയ വാര്ത്താക്കുറിപ്പില് പറയുന്നു.
കഴിഞ്ഞ ബുധനാഴ്ച പുലര്ച്ചെയോടെയാണ് ലെഗസി ഹോംസ് റിസോര്ട്ടിന് നേരെ ആക്രമണം നടന്നത്. റിസോര്ട്ടിലെ ചില്ലുകള് എറിഞ്ഞു തകര്ത്തു. കസേരകളില് ചിലത് പുറത്തിട്ട് കത്തിച്ച നിലയിലും കണ്ടെത്തി.
