കൊൽക്കത്ത: പശ്ചിമ ബംഗാളിൽ സംസ്ഥാന തലത്തിൽ നേതൃമാറ്റവുമായി ഭാരതീയ ജനത പാർട്ടി. ദിലീപ് ഘോഷിനെ മാറ്റി പശ്ചിമ ബംഗാൾ ഘടകം അധ്യക്ഷനായി സുകാന്ത മജൂംദാറിനെ ബി.ജെ.പി നിയമിച്ചു. ദിലീപ് ഘോഷിന് ദേശീയ ഉപാധ്യക്ഷ സ്ഥാനം നൽകി. ബലൂര്‍ഘട്ട് മണ്ഡലത്തില്‍ നിന്നുള്ള ലോക്സഭ എം.പിയാണ് മജൂംദാര്‍.
ദിലീപ് ഘോഷിന്‍റെ കീഴില്‍ ബി.ജെ.പി 2019 ലോക്സഭ തെരഞ്ഞെടുപ്പില്‍ 42-ല്‍ 18 സീറ്റുകള്‍ നേടി മിന്നുന്ന പ്രകടനം കാഴ്ചവെച്ചിരുന്നു.
ഉത്തര ബംഗാളിൽ പാർട്ടിക്ക് മികച്ച പ്രകടനം നടത്താൻ സാധിച്ചതിന്‍റെ അടിസ്ഥാനത്തിലാണ് മജൂംദാറിന് പശ്ചിമ ബംഗാൾ ഘടകം അധ്യക്ഷനായി നറുക്ക് വീഴാൻ കാരണം.
ദക്ഷിണ ബംഗാളിൽ നിന്നുള്ള പ്രതിപക്ഷ നേതാവ് സുവേന്ദു അധികാരിക്കൊപ്പം വടക്കൻ ബംഗാളിൽ നിന്നുള്ള മജുംദാർ കൂടി ചേരുന്നതോടെ നിയമസഭാ തെരഞ്ഞെടുപ്പിലെ കനത്ത പരാജയത്തിന് ശേഷം സംസ്ഥാനത്ത് സംഘടനയെ പുനരുജ്ജീവിപ്പിക്കാൻ സാധിക്കുമെന്നാണ് നേതൃത്വത്തിന്‍റെ ഇപ്പോഴത്തെ പ്രതീക്ഷ.
