വ്യാജരേഖ ചമയ്ക്കൽ; വിദ്യയ്‌ക്കെതിരെ നീലേശ്വരത്തും കേസ് ചാർജ് ചെയ്തു; വ്യാജ രേഖ ഉണ്ടാക്കിയത് സ്കോളർഷിപ്പ് സർട്ടിഫിക്കറ്റ് ദുരുപയോഗം ചെയ്‌തെന്ന് സംശയം

കൊച്ചി : താത്കാലിക അദ്ധ്യാപക നിയമനത്തിനായി മുൻ എസ്എഫ്ഐ നേതാവ് കെ.വിദ്യ വ്യാജരേഖ ചമച്ച കേസിൽ മഹാരാജാസിലെ രേഖകൾ പൊലീസ് ശേഖരിച്ചു. ആസ്പയര്‍ സ്കോളര്‍ഷിപ്പില്‍ മഹാരാജാസ് കോളേജിൽ 2018–19 കാലയളവില്‍ ചെയ്ത പ്രൊജക്ടിന്റെ ഭാഗമായി വിദ്യയ്ക്ക് സര്‍ട്ടിഫിക്കറ്റ് ലഭിച്ചിരുന്നു. ഈ ലെറ്റര്‍പാഡാണ് വ്യാജരേഖയാക്കി മാറ്റിയതെന്നാണു നിഗമനം. കോളജ് വൈസ് പ്രിന്‍സിപ്പൽ ആയിരുന്ന വി.കെ. ജയമോളുടെ ഒപ്പും സീലുമാണ് രേഖയിലുള്ളത്. അട്ടപ്പാടിയിൽനിന്ന് അയച്ച വ്യാജ എക്സ്പീരിയൻസ് സർട്ടിഫിക്കറ്റുകളും പൊലീസ് ശേഖരിച്ചു

അതേസമയം കരിന്തളം കോളജ് പ്രിൻസിപ്പൽ ഇൻ ചാർജ് ജെയ്‌സണിന്റെ പരാതിയിൽ വ്യാജരേഖ നിർമാണത്തിൽ വിദ്യയ്ക്കെതിരെ നീലേശ്വരത്തും പൊലീസ് കേസെടുത്തു.വ്യാജരേഖ ചമയ്ക്കൽ, ഗൂഢാലോചന, വഞ്ചനാക്കുറ്റങ്ങൾ എന്നിവയാണ് ഇവർക്കെതിരെ ചുമത്തിയിരിക്കുന്നത്. വ്യാജരേഖ വിഷയത്തിൽ മഹാരാജാസ് കോളജ് നൽകിയ പരാതിയിൽ എറണാകുളം സെൻട്രൽ പൊലീസ് നേരത്തെ കേസെടുത്തിരുന്നു. കേസ് അഗളി പൊലീസിനു കൈമാറുമെന്ന് കൊച്ചി സിറ്റി പൊലീസ് കമ്മിഷണർ പറഞ്ഞു.