അമേരിക്കൻ അധിനിവേശ ശ്രമങ്ങൾക്ക് കടുത്ത തിരിച്ചടി! ഗ്രീൻലാൻഡ് പിടിച്ചെടുക്കാനുള്ള ട്രമ്പിന്റെ നീക്കത്തെ നാലിൽ മൂന്ന് അമേരിക്കക്കാരും എതിർക്കുന്നുവെന്ന് സർവേ ഫലം

വാഷിംഗ്ടൺ: മറ്റ് രാജ്യങ്ങളുടെ മേൽ അധികാരം സ്ഥാപിക്കാനുള്ള പ്രസിഡന്റ് ഡൊണാൾഡ് ട്രമ്പിന്റെ വിദേശനയങ്ങൾക്ക് അമേരിക്കൻ ജനതയ്ക്കിടയിൽ കടുത്ത എതിർപ്പ്. ഡെന്മാർക്കിന്റെ അധീനതയിലുള്ള ഗ്രീൻലാൻഡ് പിടിച്ചെടുക്കാനുള്ള ട്രമ്പിന്റെ നീക്കത്തെ നാലിൽ മൂന്ന് അമേരിക്കക്കാരും എതിർക്കുന്നതായി സിഎൻഎൻ നടത്തിയ പുതിയ അഭിപ്രായ സർവേ വെളിപ്പെടുത്തുന്നു. ഗ്രീൻലാൻഡിന്റെ നിയന്ത്രണം ഏറ്റെടുക്കാത്ത പക്ഷം ഒന്നും സ്വീകാര്യമല്ലെന്ന് ട്രമ്പ് തന്റെ ട്രൂത്ത് സോഷ്യൽ പ്ലാറ്റ്‌ഫോമിലൂടെ ആവർത്തിക്കുമ്പോഴാണ് സ്വന്തം നാട്ടിൽ നിന്നുതന്നെ അദ്ദേഹത്തിന് തിരിച്ചടി നേരിടുന്നത്.

സർവേയിൽ പങ്കെടുത്ത 25 ശതമാനം ആളുകൾ മാത്രമാണ് ഗ്രീൻലാൻഡ് വിഷയത്തിൽ പ്രസിഡന്റിനെ പിന്തുണയ്ക്കുന്നത്. ഡെമോക്രാറ്റിക് പാർട്ടി അനുകൂലികളിൽ 94 ശതമാനം പേരും ഈ നീക്കത്തെ ശക്തമായി എതിർക്കുമ്പോൾ, റിപ്പബ്ലിക്കൻ പാർട്ടിക്കാർക്കിടയിൽ പോലും അഭിപ്രായ ഭിന്നത രൂക്ഷമാണ്. വെനസ്വേലൻ പ്രസിഡന്റ് നിക്കോളാസ് മഡുറോയെ സൈനിക നടപടിയിലൂടെ പുറത്താക്കിയതിനെത്തുടർന്ന് വെനസ്വേല ഇനി അമേരിക്ക ഭരിക്കുമെന്ന ട്രമ്പിന്റെ പ്രഖ്യാപനവും ജനങ്ങൾക്കിടയിൽ ആശങ്ക വർദ്ധിപ്പിച്ചിട്ടുണ്ട്. അമേരിക്കൻ അധികാരം മറ്റ് രാജ്യങ്ങളിലേക്ക് വ്യാപിപ്പിക്കാൻ ട്രമ്പ് നടത്തുന്ന ശ്രമങ്ങൾ അതിരുവിടുകയാണെന്ന് പത്തിൽ ആറ് അമേരിക്കക്കാരും വിശ്വസിക്കുന്നു.

വെനസ്വേലയിലെ സൈനിക ഇടപെടലിനെക്കുറിച്ച് അമേരിക്കൻ ജനത രണ്ട് തട്ടിലാണെന്ന് സർവേ വ്യക്തമാക്കുന്നു. 52 ശതമാനം പേർ സൈനിക നടപടിയെ എതിർക്കുമ്പോൾ 48 ശതമാനം പേർ അനുകൂലിക്കുന്നുണ്ട്. എന്നാൽ മഡുറോയെ നീക്കം ചെയ്ത ശേഷം വെനസ്വേലൻ സർക്കാരിന്റെ പ്രവർത്തനങ്ങളിൽ അമേരിക്ക നിയന്ത്രണം ഏർപ്പെടുത്തുന്നതിനെ ഭൂരിഭാഗം പേരും (58%) അനുകൂലിക്കുന്നില്ല. വെനസ്വേലയിലെ എണ്ണസമ്പത്തിന് മേലുള്ള അമേരിക്കയുടെ കണ്ണും സൈനിക ശക്തി പ്രദർശിപ്പിക്കാനുള്ള താല്പര്യവുമാണ് ഈ നീക്കങ്ങൾക്ക് പിന്നിലെന്നും അവിടുത്തെ ജനങ്ങളുടെ ജീവിതം മെച്ചപ്പെടുത്തുക എന്നത് സർക്കാരിന്റെ ലക്ഷ്യമല്ലെന്നും വലിയൊരു വിഭാഗം ജനങ്ങൾ കരുതുന്നു.

ട്രമ്പിന്റെ വിദേശനയങ്ങൾ ലോകരാഷ്ട്രങ്ങൾക്കിടയിൽ അമേരിക്കയുടെ അന്തസ്സ് കുറച്ചതായി 57 ശതമാനം പേർ അഭിപ്രായപ്പെടുന്നു. ഇറാനിലെ ആഭ്യന്തര പ്രക്ഷോഭങ്ങൾക്കെതിരെ കടുത്ത സൈനിക ഭീഷണികൾ മുഴക്കുന്നതും ലാറ്റിൻ അമേരിക്കൻ രാജ്യങ്ങളിൽ കടന്നുകയറുന്നതും ദീർഘകാല സൈനിക വിന്യാസത്തിലേക്ക് നയിക്കുമെന്ന ഭീതിയും സർവേ പങ്കുവെക്കുന്നുണ്ട്.