യുദ്ധഭീതിയിൽ പശ്ചിമേഷ്യ! ഇറാനിൽ നിന്നുള്ള ഇന്ത്യക്കാരുടെ ഒഴിപ്പിക്കൽ നാളെ തുടങ്ങും; അതീവ ജാഗ്രതാ നിർദ്ദേശവുമായി കേന്ദ്രം

ദില്ലി : ഇറാനും ഇസ്രായേലും തമ്മിലുള്ള സൈനിക സംഘർഷം ഏതു നിമിഷവും പൊട്ടിപ്പുറപ്പെട്ടേക്കാമെന്ന ഇന്റലിജൻസ് റിപ്പോർട്ടുകളെത്തുടർന്ന്, ഇറാനിലുള്ള ഇന്ത്യൻ പൗരന്മാരെ അടിയന്തരമായി നാട്ടിലെത്തിക്കാനുള്ള നടപടികൾ ആരംഭിച്ച് കേന്ദ്രസർക്കാർ . ടെഹ്‌റാനിൽ നിന്നുള്ള ആദ്യ വിമാനം നാളെ പുറപ്പെടുമെന്നാണ് റിപ്പോർട്ട്.

ഇറാനിലെ സ്ഥിതിഗതികൾ അനുനിമിഷം മാറിമറിയുന്ന പശ്ചാത്തലത്തിൽ, ഈ മാസം അഞ്ചിനും പതിനാലിനും കേന്ദ്ര വിദേശകാര്യ മന്ത്രാലയം രണ്ട് പ്രത്യേക ജാഗ്രതാ നിർദ്ദേശങ്ങൾ പുറപ്പെടുവിച്ചിരുന്നു. നിലവിൽ ഇറാനിലുള്ള ഇന്ത്യൻ വിദ്യാർത്ഥികൾ, തീർത്ഥാടകർ, വിനോദസഞ്ചാരികൾ, ബിസിനസ്സുകാർ എന്നിവർ ലഭ്യമായ വാണിജ്യ വിമാനങ്ങൾ വഴിയോ മറ്റ് ഗതാഗത മാർഗ്ഗങ്ങൾ വഴിയോ എത്രയും വേഗം രാജ്യം വിടണമെന്നാണ് ഏറ്റവും പുതിയ നിർദ്ദേശം. അവിടെ തുടരുന്ന പൗരന്മാർ പ്രതിഷേധ പ്രകടനങ്ങൾ നടക്കുന്ന ഇടങ്ങളിൽ നിന്ന് വിട്ടുനിൽക്കണമെന്നും ടെഹ്‌റാനിലെ ഇന്ത്യൻ എംബസിയുമായി നിരന്തരം സമ്പർക്കം പുലർത്തണമെന്നും മന്ത്രാലയം കർശനമായി ആവശ്യപ്പെട്ടിട്ടുണ്ട്.

പശ്ചിമേഷ്യൻ മേഖലയിൽ യുദ്ധം പടരാനുള്ള സാധ്യത മുൻകൂട്ടി കണ്ട് ഇന്ത്യ മുൻകരുതൽ നടപടികൾ ഊർജ്ജിതമാക്കിയിരിക്കുകയാണ്. വിദേശകാര്യ മന്ത്രാലയവും വ്യോമയാന മന്ത്രാലയവും സംയുക്തമായാണ് ഒഴിപ്പിക്കൽ ദൗത്യത്തിന് നേതൃത്വം നൽകുന്നത്. വിമാന സർവീസുകൾ മുടങ്ങുന്നതിന് മുൻപ് തന്നെ ഭൂരിഭാഗം ഇന്ത്യക്കാരെയും സുരക്ഷിതമായി നാട്ടിലെത്തിക്കാനാണ് സർക്കാർ ലക്ഷ്യമിടുന്നത്. ഇറാനിലെ പ്രാദേശിക മാധ്യമങ്ങൾ വഴിയുള്ള വാർത്തകൾ ശ്രദ്ധിക്കണമെന്നും സുരക്ഷാ ഉദ്യോഗസ്ഥരുടെ നിർദ്ദേശങ്ങൾ കർശനമായി പാലിക്കണമെന്നും ഇന്ത്യക്കാരോട് ആവശ്യപ്പെട്ടിട്ടുണ്ട്.