ഇസ്ലാമാബാദിന് കനത്ത തിരിച്ചടി! പാക് അനുകൂല കാശ്മീരി പ്രവാസി സംഘടനകൾ നിലപാട് മാറ്റുന്നു ; ഇനി വരാനിരിക്കുന്നത് വ്യാജ കശ്മീർ നറേറ്റീവുകൾ തകരുന്ന കാലം

ലണ്ടനിലും മറ്റ് യൂറോപ്യൻ രാജ്യങ്ങളിലും വടക്കേ അമേരിക്കയിലുമായി വ്യാപിച്ചുകിടക്കുന്ന പാക് അനുകൂല കാശ്മീരി പ്രവാസി സംഘടനകളും സജീവ പ്രവർത്തകരും ഇസ്ലാമാബാദിന്റെ നിലപാടുകൾക്കെതിരെ പരസ്യമായി രംഗത്തുവരുന്നതായി റിപ്പോർട്ട്. പതിറ്റാണ്ടുകളായി അന്താരാഷ്ട്ര വേദികളിൽ പാകിസ്ഥാന്റെ കശ്മീർ നയങ്ങൾക്ക് ആഗോളതലത്തിൽ വലിയ രീതിയിൽ രാഷ്ട്രീയ പിന്തുണയും നിയമസാധുതയും നേടിക്കൊടുത്തിരുന്ന പ്രവാസി കൂട്ടായ്മകളാണ് ഇപ്പോൾ ഇസ്ലാമാബാദിന് എതിരെ തിരിഞ്ഞിരിക്കുന്നത്. ഇന്ത്യയെ നിരന്തരം വിമർശിച്ചുകൊണ്ട് പാക് അധീന കശ്മീരിൽ ജനാധിപത്യവും സ്വാതന്ത്ര്യവുമുണ്ടെന്ന് ലോകത്തിന് മുന്നിൽ സ്ഥാപിക്കാൻ ശ്രമിച്ച സംഘടനകളാണ് ഇപ്പോൾ പാക് ഭരണകൂടത്തിന്റെ വിനാശകരമായ നയങ്ങളെ ചോദ്യം ചെയ്യുന്നത്.

പാക് അധീന കാശ്മീരിൽ കഴിഞ്ഞ രണ്ട് വർഷമായി തുടരുന്ന കടുത്ത വിലക്കയറ്റം, വൈദ്യുതി ചാർജ് വർധനവ്, മോശം ഭരണം എന്നിവയ്ക്കെതിരെ ഉയർന്ന ജനകീയ പ്രതിഷേധങ്ങളാണ് ഈ മാറ്റത്തിന് പ്രധാന കാരണം. സാധാരണ സാമ്പത്തിക ആവശ്യങ്ങളിൽ തുടങ്ങി പിന്നീട് ‘ജോയിന്റ് അവാമി ആക്ഷൻ കമ്മിറ്റി’യുടെ നേതൃത്വത്തിൽ വലിയ രാഷ്ട്രീയ പ്രക്ഷോഭമായി മാറിയ ഈ ജനമുന്നേറ്റം പാക് ഭരണകൂടത്തിന്റെ നിലനിൽപ്പിനെത്തന്നെയാണ് ചോദ്യം ചെയ്യുന്നത്. പ്രക്ഷോഭകർക്ക് നേരെയുള്ള അറസ്റ്റ്, ആക്രമണങ്ങൾ, ജനാധിപത്യ അവകാശങ്ങൾ നിഷേധിക്കൽ എന്നിവയെല്ലാം അന്താരാഷ്ട്ര തലത്തിൽ പാകിസ്ഥാനെ പ്രതിരോധത്തിലാക്കിയിരിക്കുകയാണ്.

ഇത്രയും കാലം ബാഹ്യശക്തികളുടെ വിമർശനങ്ങളെ പാകിസ്ഥാൻ എളുപ്പത്തിൽ തള്ളിക്കളഞ്ഞിരുന്നെങ്കിൽ, ഇപ്പോൾ തങ്ങളെ പിന്തുണച്ചിരുന്ന സ്വന്തം അണികളിൽ നിന്ന് തന്നെ ഭരണ പരാജയത്തിനെതിരെ ചോദ്യങ്ങൾ ഉയരുന്നത് ഇസ്ലാമാബാദിനെ കടുത്ത പ്രതിസന്ധിയിലാക്കുന്നു. പാകിസ്ഥാൻ അധീന കാശ്മീരിനെ സ്വാതന്ത്ര്യത്തിന്റെ മാതൃകയായി ആഗോളതലത്തിൽ ഉയർത്തിക്കാട്ടി ദശാബ്ദങ്ങളായി നിർമ്മിച്ചെടുത്ത പാകിസ്ഥാന്റെ വ്യാജ രാഷ്ട്രീയ കഥകൾ ഇതോടെ പൂർണ്ണമായും തകരുകയാണെന്ന് രാഷ്ട്രീയ നിരീക്ഷകർ വിലയിരുത്തുന്നു.