ഹെൽമറ്റില്ലാതെ സ്കൂട്ടർ യാത്ര! രമേശ് ചെന്നിത്തലയെ വസതിയിലെത്തി കണ്ട് കടകംപള്ളി സുരേന്ദ്രൻ, വീഡിയോ പുറത്ത്

തിരുവനന്തപുരം : ആഭ്യന്തരമന്ത്രി രമേശ് ചെന്നിത്തലയെ വഴുതക്കാട്ടുള്ള വസതിയിലെത്തി സന്ദർശിച്ച് കടകംപള്ളി സുരേന്ദ്രൻ. ബുധനാഴ്ച രാവിലെയായിരുന്നു രാഷ്ട്രീയ കേന്ദ്രങ്ങളിൽ കൗതുകമുണർത്തിയ ഈ കൂടിക്കാഴ്ച. ഡ്രൈവർ കൂടെയില്ലാതിരുന്നതിനാൽ സ്വന്തം സ്കൂട്ടറിലാണ് കടകംപള്ളി രമേശ് ചെന്നിത്തലയുടെ വീട്ടിലേക്ക് എത്തിയത്. തികച്ചും വ്യക്തിപരമായ ആവശ്യങ്ങൾക്കായുള്ള സന്ദർശനമായിരുന്നു ഇതെന്നാണ് ലഭ്യമാകുന്ന വിവരം.

അതേസമയം, സന്ദർശനത്തിന് ശേഷം കടകംപള്ളി സുരേന്ദ്രൻ വീട്ടിൽ നിന്നിറങ്ങി സ്കൂട്ടറിൽ കയറി പോകുന്നതിന്റെ ദൃശ്യങ്ങൾ ഇപ്പോൾ പുറത്തുവന്നിട്ടുണ്ട്. തലയിൽ ഹെൽമറ്റ് ധരിക്കാതെയാണ് കടകംപള്ളി സ്കൂട്ടർ ഓടിച്ചു പോയത്. ട്രാഫിക് നിയമങ്ങൾ ലംഘിച്ച് ഹെൽമറ്റില്ലാതെ ഇരുചക്രവാഹനം ഓടിച്ചതിനെതിരെ സാമൂഹ മാദ്ധ്യമങ്ങളിൽ വലിയ രീതിയിലുള്ള വിമർശനവും പ്രതിഷേധവും ഉയരുന്നുണ്ട്. അതേസമയം ശബരിമല സ്വർണ്ണക്കൊള്ളയിൽ പി എസ് പ്രശാന്ത് പ്രതി ചേർക്കപ്പെട്ടതിന് പിന്നാലെയാണ് ഈ സന്ദർശനം എന്നതും ശ്രദ്ധേയമാണ്. ശബരിമല സ്വർണ്ണക്കൊള്ളയിൽ കടകംപള്ളിയും പ്രതി ചേർക്കപ്പെടുമെന്ന് അഭ്യൂഹങ്ങളുണ്ടായിരുന്നു.