ചെങ്ങന്നൂര് : പമ്പാനദിയിലെ ഇറപ്പുഴ നെട്ടായത്തില് നടന്ന ഗുരു ചെങ്ങന്നൂര് ട്രോഫി ചതയം ജലോത്സവത്തിനിടെ പള്ളിയോടങ്ങൾ കൂട്ടിയിടിച്ച് നദിയിൽ വീണ തുഴച്ചിലുകാരന് മുങ്ങി മരിച്ചു. മുതവഴി പള്ളിയോടത്തിലെതുഴക്കാരനായിരുന്ന പാണ്ടനാട് നടുവിലേത്ത് വിഷ്ണുദാസ് (അപ്പു-22 ) ആണ് മരിച്ചത്.
ഇന്ന് വൈകിട്ട് നാലരയോടെ ബി ബാച്ച് പള്ളിയോടങ്ങളുടെ ഫൈനല് മത്സരത്തിലായിരുന്നു സംഭവം. അപകടത്തെ തുടര്ന്ന് ഫൈനല് മത്സരങ്ങള് ഉപേക്ഷിച്ചു.
ചെങ്ങന്നൂർ ഇറപ്പുഴം ചതയം ജലോത്സവത്തിനിടെ പള്ളിയോടങ്ങൾ കൂട്ടിയിടിച്ചു ! തുഴച്ചിൽക്കാരൻ മുങ്ങി മരിച്ചു pic.twitter.com/RRiT4CjR7h
— Tatwamayi News (@TatwamayiNews) September 17, 2024
കോടിയാട്ടുകരയും മുതവഴിയുമാണ് ഫൈനലിൽ മത്സരിച്ചത്. മത്സരത്തിനിടെ ഒരേ ട്രാക്കിലെത്തിയ പള്ളിയോടങ്ങള് തമ്മില് കൂട്ടിമുട്ടി ഇരുപള്ളിയോടങ്ങളുടെയും തുഴച്ചിലുകാര് വെള്ളത്തില് വീണിരുന്നു. മുതവഴി പള്ളിയോടം പൂര്ണമായി വെള്ളത്തില് മുങ്ങി. ഇതിനിടെയാണ് വിഷ്ണുദാസിനെ കാണാതായത്. തലകീഴായി വെള്ളത്തില് മുങ്ങിയ മുതവഴി പള്ളിയോടത്തിലെ തുഴച്ചിലുകാരെ അഗ്നിരക്ഷാസേനയുടെ ബോട്ടുകളുടെ സഹായത്തോടെ രക്ഷിച്ചെങ്കിലും വിഷ്ണുവിനെ കണ്ടെത്താനായില്ല.
തുടര്ന്ന് നടത്തിയ തിരച്ചിലിലാണ് കടവത്തിനാല്ക്കടവ് ഭാഗത്തുനിന്ന് വിഷ്ണുവിനെ കണ്ടെത്തിയത്. ചെങ്ങന്നൂര് ജില്ലാ ആശുപത്രിയില് എത്തിച്ചെങ്കിലും ജീവൻ രക്ഷിക്കാനായില്ല.
