ബ്രഹ്മപുരത്തെ തീപിടിത്തത്തെ തുടർന്ന് കൊച്ചിയിലെ മാലിന്യ നീക്കം നിലച്ചു ; റോഡുകളിൽ മാലിന്യം നിറയുന്നു

കൊച്ചി : ബ്രഹ്മപുരത്തെ തീ പിടിത്തത്തെ തുടർന്ന് കഴിഞ്ഞ ഒരാഴ്ചയായി കൊച്ചി നഗരത്തിലെ മാലിന്യ നീക്കം നിലച്ചിരിക്കുകയാണ്. കൊച്ചിയുടെ നിരത്തുകളിൽ മാലിന്യം നിറയുന്ന കാഴ്ചയാണ് ഇപ്പോൾ കാണുന്നത്. റോഡരികിൽ മാലിന്യങ്ങൾ കൂട്ടിയിട്ടിരിക്കുന്ന അവസ്ഥയാണ്. പ്രശ്നത്തിൽ പരിഹാരമുണ്ടായില്ലെങ്കിൽ സ്ഥിതി ഇതിലും രൂക്ഷമാകും. കൊച്ചി നഗരം മുഴുവൻ മാലിന്യ കൂമ്പാരങ്ങൾകൊണ്ട് നിറയും.

വീടുകളിൽ നിന്നും ഫ്‌ലാറ്റുകളിൽ നിന്നുമുള്ള മാലിന്യങ്ങളാണ് റോഡരികിൽ തള്ളുന്നത്. പലതും പുഴുവരിച്ച നിലയിലാണ് കാണപ്പെടുന്നത്. അതിൽ നിന്നും അസഹ്യമായ ദുർഗന്ധമാണ് വരുന്നത്. വഴിയാത്രക്കാർക്ക് റോഡിൽ ഇറങ്ങി നടക്കാൻ കഴിയാത്ത അവസ്ഥയാണ്. സംഭവത്തിൽ ഇതുവരെ സർക്കാരിന്റെ ഭാഗത്ത് നിന്ന് ഒരു നടപടിയും ഉണ്ടായിട്ടില്ല.