പലസ്‌തീനികൾക്ക് വേണ്ടി സമാഹരിച്ച സഹായധനം ഹമാസ് ഭീകരർക്ക് നൽകി !! ഏഴ് പേർ അറസ്റ്റിൽ; കണ്ടെത്തിയത് 67 കോടിയിലധികം രൂപയുടെ ക്രമക്കേട്

റോം : ഗസയിലെ പലസ്‌തീനികൾക്ക് വേണ്ടി സമാഹരിച്ച കോടിക്കണക്കിന് രൂപ ഹമാസിനെ സഹായിക്കാൻ വകമാറ്റിയ ഏഴ് പേരെ അറസ്റ്റ് ചെയ്ത് ഇറ്റാലിയൻ പോലീസ് അറസ്റ്റ് ചെയ്തു. സന്നദ്ധ സംഘടനകളുടെ മറവിൽ ഭീകരവാദ പ്രവർത്തനങ്ങൾക്ക് സാമ്പത്തിക സഹായം നൽകിയെന്ന അതീവ ഗൗരവകരമായ കുറ്റമാണ് ഇവർക്കെതിരെ ചുമത്തിയിരിക്കുന്നത്. സംഭവത്തിൽ ഇറ്റലിക്ക് പുറത്തുള്ള രണ്ട് പേർക്കെതിരെ അന്താരാഷ്ട്ര അറസ്റ്റ് വാറന്റും പുറപ്പെടുവിച്ചിട്ടുണ്ട്.

പലസ്തീൻ ജനതയെ സഹായിക്കാനെന്ന പേരിൽ ഔദ്യോഗികമായി പ്രവർത്തിച്ചിരുന്ന മൂന്ന് സംഘടനകളാണ് അന്വേഷണത്തിന്റെ പരിധിയിലുള്ളതെന്ന് ഇറ്റാലിയൻ പോലീസ് പ്രസ്താവനയിൽ അറിയിച്ചു. ഏകദേശം ഏഴ് ദശലക്ഷം യൂറോ (ഏകദേശം 8 ദശലക്ഷം ഡോളർ) ഇത്തരത്തിൽ ഹമാസ് നിയന്ത്രണത്തിലുള്ളതോ അല്ലെങ്കിൽ അവരുമായി ബന്ധമുള്ളതോ ആയ ഗസയിലെയും മറ്റ് പലസ്തീൻ പ്രദേശങ്ങളിലെയും സംഘടനകളിലേക്ക് കൈമാറിയതായി പോലീസ് കണ്ടെത്തി. മാനുഷിക പരിഗണനകൾ മുൻനിർത്തി ശേഖരിക്കുന്ന തുകയുടെ 71 ശതമാനത്തിലധികം ഹമാസിന്റെ നേരിട്ടുള്ള പ്രവർത്തനങ്ങൾക്കോ അല്ലെങ്കിൽ അവരുമായി ചേർന്ന് നിൽക്കുന്ന ഗ്രൂപ്പുകൾക്കോ വേണ്ടിയാണ് ഉപയോഗിച്ചിരുന്നതെന്ന് അന്വേഷണ റിപ്പോർട്ട് വ്യക്തമാക്കുന്നു.

അറസ്റ്റിലായവരിൽ ഇറ്റലിയിലെ പലസ്തീൻ അസോസിയേഷൻ പ്രസിഡന്റ് മുഹമ്മദ് ഹന്നൂനും ഉൾപ്പെടുന്നുണ്ടെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. ഭീകരാക്രമണങ്ങളിൽ ഏർപ്പെട്ടവരുടെ കുടുംബാംഗങ്ങളെ സഹായിക്കുന്നതിനായി ഈ പണത്തിന്റെ ഒരു ഭാഗം വിനിയോഗിച്ചതായും പോലീസ് വെളിപ്പെടുത്തിയിട്ടുണ്ട്. ഇറ്റാലിയൻ ആഭ്യന്തര മന്ത്രി മാറ്റിയോ പിയാന്റഡോസി സംഭവത്തെക്കുറിച്ച് പ്രതികരിക്കവെ, സാധാരണക്കാരെ സഹായിക്കാനെന്ന വ്യാജേന ഭീകര സംഘടനകൾക്ക് സഹായം എത്തിക്കുന്ന പ്രവർത്തനങ്ങളെയാണ് ഈ നീക്കത്തിലൂടെ തുറന്നുകാട്ടിയതെന്ന് പറഞ്ഞു.

ഗസയിലെ മാനുഷിക പ്രതിസന്ധികൾക്കിടയിൽ ഇത്തരത്തിൽ പണം വകമാറ്റുന്നത് ലോകമെമ്പാടുമുള്ള സഹായ വിതരണ ശൃംഖലകളുടെ വിശ്വാസ്യതയെ ബാധിക്കുമെന്ന ആശങ്കയും ഉയരുന്നുണ്ട്. അന്താരാഷ്ട്ര തലത്തിൽ ഹമാസിനെ ഭീകര സംഘടനയായാണ് ഇറ്റലിയും മറ്റ് യൂറോപ്യൻ രാജ്യങ്ങളും കാണുന്നത്. ഈ പശ്ചാത്തലത്തിൽ, ചാരിറ്റബിൾ ട്രസ്റ്റുകളുടെ മറവിൽ നടക്കുന്ന സാമ്പത്തിക ഇടപാടുകളിൽ കൂടുതൽ കർശനമായ പരിശോധനകൾ ഏർപ്പെടുത്താൻ ഇറ്റാലിയൻ അധികൃതർ തീരുമാനിച്ചിട്ടുണ്ട്.