ദില്ലിയിൽ വായുമലിനീകരണ തോത് അപകടകരമാംവിധം ഉയരാൻ സാധ്യതയെന്ന് റിപ്പോർട്ട് ; മഴയെത്തുടർന്ന് അയൽ സംസ്ഥാനങ്ങളായ പഞ്ചാബിലും ഹരിയാനയിലും വൈക്കോൽ കത്തിക്കാൻ ആരംഭിച്ചതോടെയാണ് ഈ മുന്നറിയിപ്പ്.

ദില്ലി: മലിനീകരണ തോത് അപകടകരമാംവിധം ഉയരാൻ സാധ്യതയുണ്ടെന്ന് സ്വീഡനിലെ ഗോതേൺബർഗ് സർവകലാശാലയിലെ ശാസ്ത്രജ്ഞനും പ്രൊഫസറുമായ ഡോ. രവികാന്ത് പഥക് മുന്നറിയിപ്പ് നൽകി.മഴയെത്തുടർന്ന് അയൽ സംസ്ഥാനങ്ങളായ പഞ്ചാബിലും ഹരിയാനയിലും വൈക്കോൽ കത്തിക്കാൻ ആരംഭിച്ചതോടെയാണ് ഈ മുന്നറിയിപ്പ്.

ഇതുമായി ബന്ധപ്പെട്ട പഠനത്തിനായി വിവിധ രാജ്യങ്ങളിൽ നിന്നുള്ള ഒരു കൂട്ടം ശാസ്ത്രജ്ഞരും ഗവേഷകരും ദില്ലിയിൽ ഒത്തുകൂടിയിരുന്നു. മലിനീകരണതോത് ഉയരുന്നതിന്റെ സാധ്യതകൾ പരിശോധിച്ച ഇവർ വിവിധ ഇടങ്ങളിലെ കർഷകർ ഒരുമിച്ച് വൈക്കോൽ കത്തിക്കാൻ ആരംഭിക്കുകയും ഇത് ദോഷകരമായ മാലിന്യങ്ങൾ വായുവിലേക്ക് അയക്കാൻ ഇടയാക്കുമെന്നും അറിയിച്ചു.

“വിളവെടുപ്പ് കാലം അടുത്തു വരുന്നതിനാൽ വരും ദിവസങ്ങളിൽ മലിനീകരണ തോത് 30-70 ശതമാനത്തോളം ഉയരുമെന്ന് കണക്കാക്കപ്പെടുന്നു. കാറ്റിന്റെ വേഗതയിലും ദിശയിലും ഇത് അനുസരിച്ച് വ്യത്യാസമുണ്ടാകും” ഡോ. രവികാന്ത് പഥക് പറഞ്ഞു.

അന്തരീക്ഷ മലിനീകരണം കുതിച്ചുയരുന്നത് തടയാനുള്ള ഏക മാർഗം കർഷകരിൽ നിന്ന് സർക്കാർ എല്ലാ മാലിന്യങ്ങളും എടുത്ത് വൈദ്യുതി ഉൽപ്പാദിപ്പിക്കുന്നതിന് ജൈവ ഇന്ധനമായി ഉപയോഗിക്കുക എന്നതാണ്. മറ്റ് സുസ്ഥിരമായ മാർഗങ്ങൾ നടപ്പിലാക്കാൻ കൂടുതൽ സമയം വേണ്ടി വരും. അടുത്ത വിളവെടുപ്പ് കാലം വരുന്നതിനാൽ ഇത്തരം പദ്ധതികൾ നടപ്പാക്കാനുള്ള സമയം ലഭിക്കില്ലെന്നും ഡോ. പഥക് ചൂണ്ടിക്കാട്ടി.