പ്രക്ഷോഭത്തിന്റെ പേരിൽ രാജ്യത്ത് നടന്നത് നശീകരണ നൃത്തം; ഹിന്ദുക്കളെ അടക്കം കൊലചെയ്തവരെ ശിക്ഷിക്കണം; സ്ഥാനഭ്രഷ്ടയാക്കപ്പെട്ട ശേഷമുള്ള ആദ്യ പ്രതികരണത്തിൽ ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീന

ദില്ലി: പ്രക്ഷോഭത്തിന്റെ പേരിൽ രാജ്യത്ത് നടന്നത് നശീകരണ നൃത്തമാണെന്ന് ബംഗ്ലാദേശ് മുൻപ്രധാനമന്ത്രി ഷെയ്ഖ് ഹസീന. സ്ഥാനഭ്രഷ്ടയാക്കപ്പെട്ട ശേഷമുള്ള ആദ്യ പ്രതികരണത്തിലാണ് അവർ ഇക്കാര്യം പറഞ്ഞത്. ഹിന്ദുക്കളെ അടക്കം കൊലചെയ്ത കലാപകാരികളെ ശിക്ഷിക്കണമെന്നും പുരോഗതിയിലേക്ക് പോകുകയായിരുന്ന ഒരു രാജ്യത്തെയാണ് ഈ പ്രക്ഷോഭം പ്രതിസന്ധിയിലേക്ക് തള്ളിവിട്ടതെന്നും അവർ കൂട്ടിച്ചേർത്തു. മകൻ സജീബ് വസീദിന്റെ സമൂഹ മാദ്ധ്യമ അക്കൗണ്ടിലൂടെയായിരുന്നു ഹസീനയുടെ പ്രതികരണം.

പ്രക്ഷോഭത്തിന്റെ പേരിൽ കലാപങ്ങളും കൊലപാതകങ്ങളും നടത്തിയവരെ മാതൃകാപരമായി ശിക്ഷിക്കണം. ബംഗ്ലാദേശ് സ്ഥാപകനും തന്റെ പിതാവുമായ ഷെയ്ഖ് മുജീബുർ റഹ്‌മാന്റെ സ്മാരകം തകർത്തവരെയും ശിക്ഷിക്കണം. ആഗസ്റ്റ് 15 നാണ് അദ്ദേഹത്തിന്റെ സ്‌മൃതിദിനം. അത് ഉത്തരവാദിത്തത്തോടെ രാജ്യത്ത് ആദരിക്കപ്പെടണം. കലാപത്തിൽ ജീവൻ നഷ്ടപ്പെട്ടവരുടെ ബന്ധുക്കൾക്കായി പ്രാർത്ഥിക്കുന്നു. കലാപത്തിന് ഇരയായവർക്കും തനിക്കും നീതി വേണമെന്നും ഷെയ്ഖ് ഹസീന ആവശ്യപ്പെട്ടു.