സ്റ്റോക്ക് ബ്രോക്കിങ് സ്ഥാപനമെന്ന വ്യാജേന ലക്ഷങ്ങളുടെ ഓൺലൈൻ തട്ടിപ്പ്; ഇരയായത് പോലീസ് ആസ്ഥാനത്തെ ഹൈടെക് സെൽ മുൻ ഉദ്യോഗസ്ഥൻ! ഒരാൾ പിടിയിൽ

കൊല്ലം: കേരളത്തിൽ വീണ്ടും ലക്ഷങ്ങളുടെ സൈബർ തട്ടിപ്പ്. ഇത്തവണ ഇരയായത് കേരള പോലീസ് ആസ്ഥാനത്തെ ഹൈടെക് സെല്ലിന്റെ ചുമതലയുണ്ടായിരുന്ന മുൻ ഉദ്യോഗസ്ഥൻ. ഏഴുലക്ഷം രൂപയാണ് അദ്ദേഹത്തിന് നഷ്ടമായത്. ഓൺലൈൻ ട്രേഡിങ്ങിൽ കെ.എ.പി. അടൂർ ക്യാമ്പിലെ അസിസ്റ്റന്റ് കമാൻഡന്റ് സ്റ്റാർമോൻ പിള്ളയിൽനിന്നാണ് പണം തട്ടിയത്. ഇദ്ദേഹത്തിന്റെ പരാതിയിൽ കൊല്ലം സൈബർ പോലീസ് കേസ് രജിസ്റ്റർ ചെയ്ത് അന്വേഷണം തുടങ്ങി. സൈബർ പോലീസിന്റെ ഇടപെടലിൽ പകുതിയിലേറെ തുക തിരിച്ചുപിടിച്ചതായാണ് സൂചന. ഒരാളെ കസ്റ്റഡിയിലെടുത്തിട്ടുണ്ട്.

സ്റ്റോക് ബ്രോക്കിങ് കമ്പനിയിൽ ഉദ്യോഗസ്ഥൻ ഏഴുലക്ഷം രൂപ നിക്ഷേപിക്കുകയായിരുന്നു. ഇടപാടുകൾ നടത്തിയതിന് ശേഷമാണ് കമ്പനി വ്യാജമെന്ന് കണ്ടെത്തിയത്. ഇതിനെ തുടർന്ന് നൽകിയ പരാതിയിലാണ് പോലീസ് നടപടി സ്വീകരിച്ചത്. പരാതി വേഗം നൽകിയതിനാൽ ഇടപാടുകൾ ഭാഗീകമായി മരവിപ്പിക്കാൻ പൊലീസിന് സാധിച്ചു. അതേസമയം കേരളത്തിൽ സൈബർ തട്ടിപ്പിനിരയാകുന്നവരുടെ എണ്ണം വർധിക്കുകയാണ്. അടുത്തകാലത്ത് പല പ്രമുഖരും ഇതിന്റെ ഇരയായിരുന്നു. യാക്കോബായ സഭ നിരണം ഭദ്രാസനം മുൻ അദ്ധ്യക്ഷൻ ഡോ വർഗീസ് മാർ കൂറിലോസും അടുത്തിടെ തട്ടിപ്പിന് ഇരയായിരുന്നു. 15 ലക്ഷം രൂപയാണ് അദ്ദേഹത്തിന് നഷ്ടമായത്. തട്ടിപ്പിനിരയായി എന്ന് മാത്രമല്ല പരാതി നൽകാൻ വൈകിയതും അദ്ദേഹത്തിന് തിരിച്ചടിയായിരുന്നു.