”ഒഴിപ്പിക്കൽ ഉടൻ, ഇന്ത്യാക്കാർ പടിഞ്ഞാറൻ യുക്രെയിനിലെത്തണം”; നിർദ്ദേശവുമായി ഇന്ത്യൻ എംബസി

കീവ്: റഷ്യ-യുക്രെയ്ൻ യുദ്ധം കൊടുമ്പിരികൊണ്ടിരിക്കുന്ന സാഹചര്യത്തിൽ യുക്രെയിനിലെ ഇന്ത്യക്കാർക്ക് നിർദ്ദേശം നൽകി ഇന്ത്യൻ എംബസി(Indian Embassy). ഇന്ത്യക്കാർ പടിഞ്ഞാറൻ യുക്രെയിനിലെത്തണമെന്നാണ് നിർദ്ദേശം. ഇതുസംബന്ധിച്ച മുന്നറിയിപ്പ് ഇന്ത്യൻ പൗരന്മാർക്ക് എംബസ്സി നൽകിക്കഴിഞ്ഞു.

അതേസമയം യുക്രെയ്‌നിൽ സംഘർഷാവസ്ഥ തുടരുകയാണ്, അതുകൊണ്ട് യുക്രെയ്‌നിലുള്ള ഇന്ത്യക്കാർ താമസസ്ഥലത്തോ സുരക്ഷിതമായ സ്ഥലങ്ങളിലോ തുടരണമെന്ന് നേരത്തെ ഇന്ത്യൻ എംബസി അറിയിച്ചിരുന്നു. യാത്രയിലാണെങ്കിലും സുരക്ഷിതരായിരിക്കണമെന്നും നിർദ്ദേശമുണ്ട്. കീവിലേക്ക് യാത്ര ചെയ്യുന്ന ഇന്ത്യക്കാർ തിരിതെ മടങ്ങി പോകണം. കൂടുതൽ വിവരങ്ങൾ അറിയിക്കാമെന്നും ഇന്ത്യൻ എംബസി വ്യക്തമാക്കി.

എന്നാൽ യുക്രെയ്ൻ തലസ്ഥാനമായ കീവിലെ വിമാനത്താവളം അടച്ചതോടെ വിമാനസർവ്വീസുകൾ മുടങ്ങിയിരിക്കുകയാണ്. അതേസമയം ഭാരതീയരെ കൊണ്ടുവരാൻ പോയ എയർ ഇന്ത്യ വിമാനം തലസ്ഥാനമായ കീവിൽ നിന്നും നിന്നും മടങ്ങി. വിമാനത്താവളം അടച്ചതിനാൽ രക്ഷാദൗത്യം പൂർത്തിയാക്കാനായില്ല എന്നാണ് വിവരം. ഇന്ത്യയുടെ വന്ദേഭാരത് വിമാനം രാവിലെ ഏഴരക്കായിരുന്നു ദില്ലിയിൽ നിന്നും പുറപ്പെട്ടത്. ബോറിസിൽ എത്തിയ ശേഷം യാത്രക്കാരെ കൊണ്ട വരാൻ കഴിയാതെ മടങ്ങുകയായിരുന്നു. വ്യോമത്താവളങ്ങളിലെല്ലാം നിയന്ത്രണമേർപ്പെടുത്തിയ സാഹചര്യത്തിലാണിത്.