വിമാനത്താവളത്തിൽ സ്വീകരിക്കാനെത്തിയത് ജൂനിയർ മന്ത്രി; വൻ പ്രതീക്ഷയുമായി റഷ്യയിൽ എത്തിയ ഇമ്രാൻ ഖാൻ നാണംകെട്ടത് ചരിത്രത്തിലില്ലാത്ത വിധം

മോസ്കോ: റഷ്യൻ സന്ദർശനത്തിൽ നാണംകെട്ട് പാകിസ്ഥാൻ പ്രധാനമന്ത്രി. റഷ്യ-യുക്രെയ്ൻ യുദ്ധവും ആരംഭിച്ചതിനു തൊട്ടുപിന്നാലെയാണ് പാക് പ്രധാനമന്ത്രി ഇമ്രാൻ ഖാൻ മോസ്കോയിലെത്തിയത്(Imran Khan Visit To Russia). എന്നാൽ പുര കത്തുമ്പോൾ വാഴ വെട്ടാൻ നടക്കുന്ന പാകിസ്ഥാന് കിട്ടിയത് അവഗണന മാത്രമായിരുന്നു എന്നാണ് റിപ്പോർട്ട്. വിചാരിച്ചത് നടക്കുന്ന ലക്ഷണമില്ലെന്ന് മാത്രമല്ല ഇതുവരെയില്ലാത്ത രീതിയിൽ പാക് പ്രധാനമന്ത്രി നാണവും കെട്ടു.

റഷ്യൻ വിദേശകാര്യ സഹമന്ത്രി ഇഗോർ മോർഗുലോവിന്റെ നേതൃത്വത്തിലാണ് ഇമ്രാൻ ഖാനെ സ്വീകരിച്ചത്. സാധാരണഗതിയിൽ ഒരു രാജ്യത്തെ പ്രധാനമന്ത്രിയോ പ്രസിഡന്റോ എത്തുമ്പോൾ റഷ്യൻ പ്രസിഡന്റ് വ്‌ളാഡിമർ പുടിനോ അല്ലെങ്കിൽ ഉന്നത സ്ഥാനത്തിരിക്കുന്നവരോ എത്തിയാവും സ്വീകരിക്കുക. എന്നാൽ ഇമ്രാൻഖാൻ എത്തിയപ്പോൾ ഇതൊന്നുമുണ്ടായില്ല. വമ്പൻ സ്വീകരണം പ്രതീക്ഷിച്ചെത്തിയ ഇമ്രാനെയും കൂട്ടരെയും സ്വീകരിച്ചത് ജൂനിയറായ ഡെപ്യൂട്ടി വിദേശകാര്യ മന്ത്രിയുടെ നേതൃത്വത്തിലുള്ള സംഘമാണെന്നത് ശ്രദ്ധേയം.

വാതക പൈപ്പ് ലൈൻ, സാമ്പത്തിക സഹായം തുടങ്ങിയ വൻ പ്രതീക്ഷകളുമായാണ് ഇമ്രാൻ പരിവാര സമേതം മോസ്കാേയിൽ എത്തിയത്. പാക് വിദേശകാര്യ മന്ത്രി ഷാ മഹ്മൂദ് ഖുറേഷി, ഇൻഫർമേഷൻ മന്ത്രി ഫവാദ് ചൗധരി, ആസൂത്രണ വികസന മന്ത്രി അസദ് ഉമർ, വാണിജ്യ ഉപദേഷ്ടാവ് അബ്ദുൾ റസാഖ് ദാവൂദ്, ദേശീയ സുരക്ഷാ ഉപദേഷ്ടാവ് മൊയീദ് യൂസഫ് എന്നിവരും സംഘത്തിലുണ്ടായിരുന്നു.

അതേസമയം ഇമ്രാന്റെ സന്ദർശനം റഷ്യ ഗൗനിക്കുന്നില്ല എന്ന സന്ദേശമാണ് റഷ്യയുടെ പെരുമാറ്റത്തിലൂടെ ലോകത്തിന് നൽകുന്നത്. രണ്ട് പതിറ്റാണ്ടിന് ശേഷം ആദ്യമായാണ് ഒരു പാകിസ്ഥാൻ ഉന്നത ഭരണാധികാരി റഷ്യ സന്ദർശിക്കുന്നത്. ക്രെംലിനുമായുള്ള ബന്ധം പുനഃസജ്ജമാക്കുകയും ഊർജ്ജ മേഖലയിൽ സഹകരണം വിപുലീകരിക്കുകയുമാണ് ഇമ്രാന്റെ സന്ദർശനത്തിന്റെ പ്രധാന ലക്ഷ്യം.