നഴ്സിന്റെ വേഷത്തിലെത്തി പ്രസവിച്ചു കിടന്ന യുവതിയെ കുത്തിവച്ചു കൊല്ലാൻ ശ്രമം; തിരുവല്ലയിൽ ഭർത്താവിന്റെ പെൺസുഹൃത്ത് പിടിയിൽ

തിരുവല്ല : പ്രസവ ശേഷം ആശുപത്രിയിൽ ചികിത്സയിലായിരുന്ന യുവതിയെ നഴ്സിന്റെ വേഷത്തിലെത്തി കുത്തിവച്ചു കൊലപ്പെടുത്താൻ ശ്രമിച്ച യുവതി പോലീസ് കസ്റ്റഡിയിൽ. പരുമലയിലെ സ്വകാര്യ ആശുപത്രിയിലിയാണ് വിചിത്രവും ഞെട്ടിക്കുന്നതുമായ സംഭവം നടന്നത്. കായംകുളം സ്വദേശി അനുഷ (25) ആണ് പുളിക്കീഴ് പോലീസിന്റെ പിടിയിലായത്. പുല്ലുകുളങ്ങര സ്വദേശി സ്നേഹയെ (25) ആണ് ഇവർ കൊലപ്പെടുത്താൻ ശ്രമിച്ചത്. സ്നേഹയുടെ ഭർത്താവ് അരുണിന്റെ സുഹൃത്താണ് അനുഷയെന്നാണ് പോലീസ് പറയുന്നത്.

സ്നേഹയെ ഒരാഴ്ച മുൻപാണ് ആശുപത്രിയിൽ പ്രസവത്തിനായി പ്രവേശിച്ചത്. പ്രസവശേഷം ഇന്ന് രാവിലെ സ്നേഹയെ ഡിസ്ചാർജ് ചെയ്തുവെങ്കിലും നിറം മാറ്റം ഉള്ളതിനാൽ കുഞ്ഞിനെ ഡിസ്ചാർജ് ചെയ്തില്ല. ഇതോടെ സ്നേഹയും മാതാവും മുറിയിൽ കാത്തിരിക്കുകയായിരുന്നു. വൈകുന്നേരം അഞ്ചരയോടെ നഴ്സിന്റെ ഓവർക്കോട്ട് ധരിച്ച അനുഷ ഇവരുടെ മുറിയിലെത്തി കുത്തിവയ്‌പ്പെടുക്കുവാൻ വന്നതാണെന്ന് പറഞ്ഞു. എന്നാൽ ഡിസ്ചാർജ് ചെയ്ത സ്നേഹയ്ക്ക് ഇനി എന്തിനാണ് കുത്തിവയ്‌പ്പെന്ന് മാതാവ് ചോദിച്ചു. പെട്ടെന്ന് ഒരു കുത്തിവയ്പ്പു കൂടി ഉണ്ടെന്നു പറഞ്ഞ് അനുഷ, സ്നേഹയുടെ കയ്യിൽ പിടിച്ച് സിറിഞ്ച് കൊണ്ടു കുത്താൻ ശ്രമിക്കുകയായിരുന്നു . സിറിഞ്ചിൽ മരുന്ന് ഉണ്ടായിരുന്നില്ല. മാതാവ് ബഹളം കേട്ട് ആശുപത്രി ജീവനക്കാർ ഓടിയെത്തുകയും അനുഷയെ പിടിച്ചുമാറ്റി തടഞ്ഞുവച്ച് പോലീസിൽ വിവരം അറിയിക്കുകയുമായിരുന്നു.