കണ്ണൂരിൽ എട്ടാംക്ലാസുകാരി ആത്മഹത്യ ചെയ്ത സംഭവം ; അദ്ധ്യാപിക ശകാരിച്ചുവെന്ന് സുഹൃത്ത്, അദ്ധ്യാപികയുടെ മൊഴി ഇന്ന് രേഖപ്പെടുത്തും

കണ്ണൂർ: എട്ടാംക്ലാസുകാരിയുടെ ആത്മഹത്യയിൽ നിർണ്ണായക വെളിപ്പെടുത്തലുമായി മരിച്ച റിയയുടെ സുഹൃത്ത്. ഡെസ്കിലും ചുമരിലും മഷി ആയതിനാൽ അദ്ധ്യാപിക ശകാരിച്ചുവെന്നും അതിന് പിഴയായി 25000 രൂപ ആവശ്യപ്പെട്ടെന്നും റിയയുടെ സുഹൃത്ത് പറഞ്ഞു. കൂടാതെ റിയയുടെ സ്റ്റുഡന്റ് പോലീസ് കേഡറ്റ് അംഗത്വം റദ്ദാക്കുമെന്ന് പറഞ്ഞതായും ഇതിൽ ഒരുപാട് വേദനിച്ച് കരഞ്ഞുകൊണ്ടാണ് റിയ വീട്ടിലേക്ക് പോയതെന്നുമാണ് പെൺകുട്ടി വെളിപ്പെടുത്തിയത്. സംഭവത്തിൽ സ്കൂൾ പ്രിൻസിപ്പൽ ഇതുവരെ പ്രതികരിച്ചിട്ടില്ല. റിയയുടെ ആത്മഹത്യാ കുറിപ്പിൽ പേരുള്ള അദ്ധ്യാപികയുടെ മൊഴി ഇന്ന് രേഖപ്പെടുത്തുമെന്ന് പോലീസ് അറിയിച്ചു.

പെരളശ്ശേരി എ കെ ജി മെമ്മോറിയൽ ഹയർ സെക്കന്ററി സ്കൂളിലെ എട്ടാം ക്ലാസ്സ് വിദ്യാർത്ഥിയാണ് റിയ പ്രവീൺ. സ്കൂളിൽ നിന്നും വൈകീട്ട് വീട്ടിലെത്തിയ എട്ടാം ക്ലാസുകാരി അദ്ധ്യാപികയുടെയും സഹപാഠിയുടെയും പേരെഴുതി വച്ച് കിടപ്പുമുറിയിലെ ജനലിൽ ഷാൾ കുരുക്കി ആത്മഹ്യ ചെയ്യുകയായിരുന്നു. വിശദമായ അന്വേഷണം നടക്കുകയാണെന്ന് പോലീസ് അറിയിച്ചു.