കരിപ്പൂർ വിമാനത്താവളത്തിൽ വീണ്ടും സ്വർണ്ണം കടത്താൻ ശ്രമം;മഞ്ചേരി സ്വദേശി താഹിർ അറസ്റ്റിൽ

മലപ്പുറം: കരിപ്പൂർ വിമാനത്താവളം വഴി സ്വർണ്ണം കടത്താൻ ശ്രമിച്ച മഞ്ചേരി സ്വദേശി താഹിർ പിടിയിൽ.
ഇയാളുടെ പക്കൽ നിന്നും ഒരു കിലോ സ്വർണ്ണമാണ് പോലീസ് പിടിച്ചെടുത്തത്.വിമാനത്താവളത്തിന്റെ പരിസരത്ത് നിന്നാണ് ഇയാളെ അറസ്റ്റ് ചെയ്തത്.മലദ്വാരത്തിൽ ഒളിപ്പിച്ചായിരുന്നു ഇയാൾ സ്വർണ്ണം കടത്താൻ ശ്രമിച്ചത്.

വിമാനത്താവളത്തിൽ നടത്തിയ സുരക്ഷാ പരിശോധനയ്‌ക്കിടെ സ്വർണ്ണം കണ്ടെത്താൻ അധികൃതർക്ക് കഴിഞ്ഞില്ല. ഇതിന് ശേഷം പുറത്തിറങ്ങിയ ഇയാളെ സംശയം തോന്നിയ പോലീസ് നിരീക്ഷിക്കുകയായിരുന്നു. താഹിറിനെ കൊണ്ടുപോകാൻ ബന്ധുക്കൾ വാഹനവുമായി എത്തിയിരുന്നു. ഇതിൽ കയറുന്നതിനിടെ പോലീസ് പിടികൂടുകയായിരുന്നു.

ചോദ്യം ചെയ്തപ്പോൾ ആദ്യം ഇയാൾ കുറ്റം നിഷേധിച്ചു. എന്നാൽ പിന്നീട് നടത്തിയ എക്‌സ്‌റേ പരിശോധനയിൽ സ്വർണം കണ്ടെത്തുകയായിരുന്നു. സ്വർണം ക്യാപ്‌സൂൾ രൂപത്തിലാക്കിയാണ് ഇയാൾ മലദ്വാരത്തിൽ ഒളിപ്പിച്ചത്. നാല് ക്യാപ്‌സൂളുകൾ ഇയാളുടെ പക്കൽ നിന്നും പിടിച്ചെടുത്തു. പിടിച്ചെടുത്ത സ്വർണ്ണത്തിന് വിപണിയിൽ 54 ലക്ഷം രൂപ വിലവരുമെന്ന് പോലീസ് അറിയിച്ചു.