ഭർത്താവുമായി ഫോണിൽ തർക്കം!യുവതി സ്വയം തീകൊളുത്തി മരിച്ചു ; പൊള്ളലേറ്റ മക്കൾ ചികിത്സയിൽ

പാലക്കാട് : ഭർത്താവുമായി ഫോണിലുണ്ടായ തർക്കത്തെത്തുടർന്ന് സ്വയം തീകൊളുത്തിയ യുവതി മരിച്ചു. വല്ലപ്പുഴയിൽ ചെറുകോട് മുണ്ടാത്തുപറമ്പിൽ പ്രദീപിന്റെ ഭാര്യ ബീന (30) ആണ് മരിച്ചത്. മക്കളായ നിഖ (12), നിവേദ (8) എന്നിവർ പൊള്ളലേറ്റ് ആശുപത്രിയിൽ ചികിത്സയിൽ തുടരുകയാണ്. ഞായറാഴ്ച പുലർച്ചെയായിരുന്നു സംഭവം.

ബീനയുടെയും പ്രദീപിന്റെയും പ്രണയവിവാഹമായിരുന്നു. ജോലിയുമായി ബന്ധപ്പെട്ട് പ്രദീപ്‌ വടകരയിലാണ് താമസം. രണ്ടുമാസം കൂടുമ്പോൾ മാത്രമേ നാട്ടിൽ വരാറുള്ളൂ. ഞായറാഴ്ച പുലർച്ചെ ഫോണിൽ സംസാരിക്കുന്നതിനിടെ ബീനയും പ്രദീപും തമ്മിൽ വഴക്കുണ്ടാണ്ടാകുകയും പിന്നാലെ പുലർച്ചെ 2.30ഓടെ കിടപ്പുമുറിയിൽ കയറിയ ബീന തീകൊളുത്തുകയായിരുന്നു. ഈ സമയം മുറിയിൽ കിടന്നുറങ്ങുകയായിരുന്ന മക്കൾക്കും പൊള്ളലേറ്റു. ഉടൻതന്നെ മൂന്നു പേരെയും തൃശൂർ മെഡിക്കൽ കോളജ് ആശുപത്രിയിൽ എത്തിച്ചു. മകൾ നിഖയ്ക്ക് 90 ശതമാനം പൊള്ളലേറ്റിട്ടുണ്ട്. നിവേദയുടെ പരിക്ക് സാരമുള്ളതല്ല എന്നാണ് വിവരം.

പ്രദീപിന്റെ മാതാപിതാക്കളും അനുജനും ഭാര്യയും ഈ വീട്ടിൽ തന്നെയാണ് താമസം. സംഭവത്തിൽ പട്ടാമ്പി പൊലീസ് അന്വേഷണം ആരംഭിച്ചു.

(ശ്രദ്ധിക്കുക: ആത്മഹ‌ത്യ ഒന്നിനും പരിഹാരമല്ല. മാനസികാരോഗ്യ വിദഗ്‌ധരുടെ സഹായം തേടുക, അതിജീവിക്കാൻ ശ്രമിക്കുക. ഹെൽപ്‌ലൈൻ നമ്പരുകൾ – 1056, 0471- 2552056)