മലയാളികളുടെ പ്രിയപ്പെട്ട അർജുനൻ മാസ്റ്റർ വിടവാങ്ങിയിട്ട് 2 വർഷം; സംഗീതം നൽകിയ അവസാന ഗാനം ഇത്!

ജനമനസുകളിൽ മധുരമായ ഈണങ്ങൾ നൽകി മലയാളികളുടെ മനസിൽ കുടിയേറിയ സംഗീത സംവിധായകൻ എം.കെ അർജുനൻ മാസ്റ്റർ വിടവാങ്ങിയിട്ട് 2 വർഷം പൂർത്തിയാക്കുകയാണ്. അദ്ദേഹം അവസാനമായി സംഗീതം നൽകിയ ഗാനം ഇത് വരെ പുറം ലോകം കണ്ടിട്ടില്ല.

2019 ൽ പ്രളയ വേളയിൽ കേരളം ഒരു മനസോടെ നിന്നതിനെ ആസ്പദമാക്കി ഒന്നായവർ എന്ന ശീർഷകത്തിൽ തയ്യാറാക്കിയ ആൽബം ഗാനത്തിനാണ് മാസ്റ്റർ അവസാനമായി സംഗീതം നൽകിയതെന്നാണ് പറയപ്പെടുന്നത്.

തന്റെ ഈ ഗാനത്തിന് അർജുനൻ മാസ്റ്റർ തന്നെ ഈണം നൽകണമെന്ന ഗാന രചയിതാവ് അബ്ദുല്ല മട്ടാഞ്ചേരിയുടെ ആഗ്രഹം അദ്ദേഹത്തെ അറിയിക്കുകയും അസുഖ ബാധിതനായി വീട്ടിൽ വിശ്രമിക്കുകയാണെങ്കിൽ കൂടി അദ്ദേഹം ഈണം നൽകുകയായിരുന്നുവെന്ന് അബ്ദുല്ല മട്ടാഞ്ചേരി വ്യക്തമാക്കിയത്. പ്രശസ്ത പിന്നണി ഗായകൻ അഫ്സലാണ് ഒന്നായവർ നമ്മൾ ഒന്നായവർ എന്ന ഈ ഗാനം ആലപിച്ചിരിക്കുന്നത്.

നടൻ മമ്മൂട്ടിയുടെ ഇൻസ്റ്റർഗ്രാം പേജ് വഴി ഗാനം റിലീസ് ചെയ്യണമെന്ന ആഗ്രഹവുമായി കാത്തിരിക്കുമ്പോഴാണ് അർജുനൻ മാസ്റ്ററുടെ വിട വാങ്ങൽ.അർജുനൻ മാസ്റ്റർ അവസാനമായി ചിട്ടപ്പെടുത്തിയ ഗാനം മമ്മൂട്ടിയുടെ ഇൻസ്റ്റർഗ്രാം പേജ് വഴി പ്രകാശനം ചെയ്യാൻ കഴിയുമെന്ന വിശ്വാസത്തിലാണ് മട്ടാഞ്ചേരിയിലെ പൊതു രംഗത്തെ സജീവ സാന്നിധ്യം കൂടിയായ അബ്ദുല്ല മട്ടാഞ്ചേരി.വളരെ മനോഹരമായ വരികളാണ് ഈ ഗാനത്തിന്റേത്.പ്രളയം കേരളത്തെ പിടിച്ച് കുലുക്കിയ വേളയിൽ ജാതി മത രാഷ്ട്രീയ വ്യത്യാസമന്യേ ജനം ഒന്നായി നിന്നതും രക്ഷാപ്രവർത്തനങ്ങളിൽ ഏർപ്പെട്ടതും വരികളിൽ എടുത്തുപറയേണ്ട കാര്യമാണ്.