ദില്ലി : ആം ആദ്മി എംപി സ്വാതി മലിവാളിനെ ആക്രമിച്ച കേസിൽ പ്രതിയായ കെജ്രിവാളിന്റെ സഹായി ബൈഭവ് കുമാറിനെ തെളിവെടുപ്പിനായി മുംബൈയിൽ എത്തിച്ചു. തെളിവുകൾ നശിപ്പിക്കാൻ ബൈഭവ് കുമാറിന്റെ ഫോൺ ഫോർമാറ്റ് ചെയ്ത സ്ഥലത്തേക്ക് ഇയാളെ കൊണ്ട് പോകുമെന്ന് ദില്ലി പോലീസ് തീസ് ഹസാരി കോടതിയിൽ നേരത്തെ അറിയിച്ചിരുന്നു.
കേസുമായി ബന്ധപ്പെട്ട നിർണായക തെളിവുകൾ നശിപ്പിക്കാൻ വേണ്ടിയാണോ ഫോൺ ഫോർമാറ്റിങ് നടത്തിയതെന്ന് കണ്ടെത്താനാണ് തെളിവെടുപ്പ് നടത്തുന്നതെന്ന് പൊലീസ് വ്യക്തമാക്കി. ബൈഭവ് കുമാറിന്റെ പൊലീസ് കസ്റ്റഡി കാലാവധി വ്യാഴാഴ്ച അവസാനിക്കും. അതിനാൽ, ദില്ലി പൊലീസ് പ്രതിക്കായി റിമാൻഡ് കാലാവധി നീട്ടി ചോദിക്കാനാണ് സാധ്യത. അതേസമയം, കേസ് അന്വേഷിക്കാൻ പ്രത്യേക അന്വേഷണ സംഘത്തിന് രൂപം നൽകിയിരിക്കുകയാണ്.
ആഴ്ചകൾക്ക് മുൻപാണ് ആം ആദ്മി എംപി സ്വാതി മാലിവാളിനെ ദില്ലി മുഖ്യമന്ത്രി കെജ്രിവാളിന്റെ വസതിയിൽ വച്ച് കെജ്രിവാളിന്റെ പേർസണൽ അസിസ്റ്റന്റ് ബൈഭവ് കുമാർ ആക്രമിക്കുന്നത്. ആക്രമണത്തിൽ സ്വാതി മാലിവാളിന് പരിക്കുകൾ ഉള്ളതായുള്ള മെഡിക്കൽ റിപ്പോർട്ടും പുറത്തുവന്നിരുന്നു. തുടർന്ന് സ്വാതി മാലിവാളിന്റെ പരാതിയിൽ പൊലീസ് കേസെടുക്കുകയും ബൈഭവിനെ അറസ്റ്റ് ചെയ്യുകയുമായിരുന്നു. നേരെ ഇയാളെ കെജ്രിവാളിന്റെ വസതിയിലെത്തിച്ചും തെളിവെടുപ്പ് നടത്തിയിരുന്നു.
