ഇന്ത്യയ്ക്ക് തിരിച്ചടി ! പരിക്കേറ്റ ഓൾ റൗണ്ടർ ഹാർദിക് പാണ്ഡ്യ കിവീസിനെതിരായ അടുത്ത മത്സരത്തിൽ കളിച്ചേക്കില്ല

പൂനെ : ഇന്നലെ ബംഗ്ലാദേശിനെതിരായ മത്സരത്തിനിടെ പരിക്കേറ്റ ഇന്ത്യൻ ഓൾ റൗണ്ടർ ഹാർദിക് പാണ്ഡ്യ ന്യൂസിലാൻഡിനെതിരായ അടുത്ത മത്സരത്തിൽ കളിച്ചേക്കില്ല. വരുന്ന ഞായറാഴ്ച ധരംശാലയിലെ ഹിമാചൽ പ്രദേശ് ക്രിക്കറ്റ് അസോസിയേഷൻ സ്റ്റേഡിയത്തിലാണ് ഇന്ത്യ– ന്യൂസീലന്‍ഡ് പോരാട്ടം.

ബംഗ്ലദേശിനെതിരായ ബോളിങ്ങിനിടെ പാണ്ഡ്യയുടെ കാൽക്കുഴയ്ക്കാണു പരിക്കേറ്റത്. മത്സരത്തിന്റെ ഒമ്പതാം ഓവര്‍ ബൗള്‍ ചെയ്യുന്നതിനിടെയാണ് താരത്തിന്റെ കാലിന് പരിക്കേറ്റത്. ഹാര്‍ദിക് എറിഞ്ഞ ഒമ്പതാം ഓവറിലെ മൂന്നാം പന്തില്‍ ബംഗ്ലാദേശ് ഓപ്പണര്‍ തന്‍സിദ് ഹസന്‍ ഒരു സ്ട്രെയ്റ്റ് ഡ്രൈവിലൂടെ ബൗണ്ടറി നേടിയിരുന്നു. ഈ ഷോട്ട് തടയാന്‍ ശ്രമിക്കുന്നതിനിടെയാണ് താരത്തിന് പരിക്കേറ്റത്. പിന്നീട് ബൗള്‍ ചെയ്യാന്‍ ശ്രമിച്ചെങ്കിലും താരത്തിന് സാധിച്ചില്ല. തുടര്‍ന്ന് അദ്ദേഹം മൈതാനം വിട്ടു. വിരാട് കോലിയാണ് ഓവറിലെ ശേഷിച്ച പന്തുകള്‍ ബൗള്‍ ചെയ്തത്ബാൻഡേജ് ചുറ്റി കളിക്കാൻ ശ്രമിച്ചെങ്കിലും വേദന അനുഭവപ്പെട്ടതോടെ മുടന്തിയാണ് ഹാര്‍ദിക് ഫിസിയോമാരോടൊപ്പം ഗ്രൗണ്ടിൽനിന്നു മടങ്ങിയത്.

പാണ്ഡ്യയുടെ പരുക്ക് ഗുരുതരമല്ലെന്ന് ടീം നായകൻ രോഹിത് ശർമ അറിയിച്ചിരുന്നു. പാണ്ഡ്യയുടെ സ്കാനിങ് റിപ്പോർട്ടിൽ പ്രശ്നങ്ങളൊന്നും കണ്ടെത്തിയിട്ടില്ലെങ്കിലും വിദഗ്ധ ചികിത്സ നൽകാനാണ് ബിസിസിഐയുടെ തീരുമാനം. പാണ്ഡ്യ ടീം ക്യാംപ് വിട്ട് ബെംഗളൂരുവിലെ ദേശീയ ക്രിക്കറ്റ് അക്കാദമിയിലേക്കു പോകേണ്ടിവരും. യുകെയിൽനിന്നുള്ള ഡോക്ടറാണു താരത്തെ പരിശോധിക്കുന്നത്. താരത്തിന് ഒരു കളി നഷ്ടമാകുമെന്നും ദേശീയ മാധ്യമം റിപ്പോർട്ട് ചെയ്തു. ഈ മാസം 29ന് ലക്നൗവിൽ ഇംഗ്ലണ്ടിനെതിരെയുള്ള മത്സരത്തിൽ താരം ടീമിനൊപ്പം ചേരുമെന്നാണു പ്രതീക്ഷിക്കുന്നത്.