വയനാട് : മുണ്ടക്കൈയിൽ നിന്നും ചൂരൽമലയിലേക്ക് നിർമ്മിക്കുന്ന ബെയ്ലി പാലം വയനാടിന് സമർപ്പിച്ച് സൈന്യം. രക്ഷാപ്രവർത്തനം പൂർത്തിയായാലും പാലം പൊളിക്കില്ലെന്നും ജനങ്ങൾക്ക് സമർപ്പിക്കുകയാണെന്നും മേജർ ജനറൽ വി.ടി മാത്യു അറിയിച്ചു. ബെയ്ലി പാലത്തിന്റെ നിർമാണം ഉച്ചയോടെ പൂർത്തിയാകുമെന്നാണ് പുറത്തുവരുന്ന വിവരം.
ഇന്നലെ സൈന്യത്തിന്റെ നേതൃത്വത്തിൽ ആരംഭിച്ച പാലത്തിന്റെ നിർമ്മാണം രാത്രി വൈകിയും പുരോഗമിക്കുകയായിരുന്നു. അതിനാലാണ് ഇത്ര വേഗത്തിൽ പാലത്തിന്റെ നിർമ്മാണം പൂർത്തിയാക്കാൻ സാധിക്കുന്നത്. അതേസമയം, പാലം നിർമ്മാണം പൂർത്തിയാകുന്നതോടെ യന്ത്രസഹായത്തോടെ രക്ഷാപ്രവർത്തനം ദ്രുതഗതിയിലാകുമെന്ന് മേജർ ജനറൽ വി.ടി മാത്യു അറിയിച്ചു. ഭാരമേറിയ വാഹനങ്ങൾ പോലും കടന്ന് പോവാൻ കഴിയുന്നത്ര ബലത്തിലാണ് പാലം നിർമിക്കുന്നത്. പാലം പൂർത്തിയായാൽ ഉടനെ രണ്ടാം ഘട്ട രക്ഷാപ്രവർത്തനം ആരംഭിക്കും. സർക്കാർ സ്ഥിരമായ ഒരു പാലം നിർമ്മിക്കുന്നതുവരെ ഇവിടുത്തെ ജനങ്ങൾക്ക് ജനങ്ങൾക്ക് ബെയ്ലി പാലം സഞ്ചാരത്തിന് ഉപയോഗിക്കാമെന്നും മേജർ ജനറൽ അറിയിച്ചു.
