സംഗതി കളറാകും മോനെ! ബിഗ്ഗ് ബോസില്‍ വന്‍ ട്വിസ്റ്റ്! പതിനാലാം ദിവസം സംഭവിച്ചത്

ബിഗ്ഗ് ബോസ് പതിനാലാം ദിവസമായ ഇന്നലെ വന്‍ നടകീയ സംഭവങ്ങളും സര്‍പ്രൈസുകള്‍ക്കുമാണ് പ്രേക്ഷകര്‍ സാക്ഷ്യം വഹിച്ചത്. എലിമിനേഷനില്‍ പെട്ട ബ്ലെസ്ലി, ജാസ്മിന്‍, നിമിഷ, റോബിന്‍, ഡെയ്‌സി എന്നിവരെ ആക്ടീവിറ്റി ഏരിയയില്‍ കൊണ്ടിരുത്തിക്കൊണ്ടായിരുന്നു ബാക്കി പ്രക്രിയകള്‍ നടത്തിയത്. ഈ അഞ്ച് പേര്‍ക്കും മറ്റ് മത്സരാര്‍ത്ഥികളോട് എന്തെങ്കിലും പറയാനുണ്ടെങ്കില്‍, അത് പറയാനുള്ള അവസരം ബിഗ്ഗ് ബോസ് നല്‍കിയിരുന്നു. ആ സംസാര ചെറിയ തോതില്‍ വാക്കേറ്റത്തിലാണ് അവസാനിച്ചത്.

എപ്പിസോഡ് തുടങ്ങിയത് മുതല്‍ ജാസ്മിനും നിമിഷയും തങ്ങളുടെ സൗഹൃദത്തെ കുറിച്ച് സംസാരിക്കുന്നുണ്ടായിരുന്നു. ഞങ്ങളില്‍ ആര് പോയാലും വിഷമമുള്ള കാര്യമാണെന്ന് ഇരുവരും പറഞ്ഞു. ബ്ലെസ്ലിയും ഡെയ്‌സിയും റോബിനും സേഫ് ആയപ്പോള്‍ അവസാനം അവശേഷിച്ചത് നിമിഷയും ജാസ്മിനും മാത്രമാണ്. അപ്പോള്‍ മുതല്‍ നിമിഷ കരയാനും തുടങ്ങിയിരുന്നു. അപ്പോഴൊക്കെ വളരെ ശക്തമായി നിമിഷയെ ആശ്വസിപ്പിയ്ക്കുകയായിരുന്നു ജാസ്മിന്‍.

നിമിഷ പുറത്താകുന്നു എന്ന സ്ഥിരീകരിച്ച ആ നിമിഷം ജാസ്മിന്‍ നിലവിട്ട് ഒന്ന് പൊട്ടിക്കരഞ്ഞു പോയി. എന്നാല്‍ പിന്നീട് മനോധൈര്യം വീണ്ടെടുത്ത് നിമിഷയെ കരയാതെ പുറത്തേക്ക് അയക്കാനുള്ള തത്രപ്പാടിലായിരുന്നു. നിമിഷയെ യാത്രയാക്കി ജാസ്മിന്‍ നേരെ പോയത് ബാത്രൂമിലേക്കാണ്. അവിടെ വച്ചാണ് ജാസ്മിന്‍ ശരിയ്ക്കും തന്റെ സങ്കടം പ്രകടമാക്കിയത്. പൊട്ടിക്കരയുകയായിരുന്നു ജാസ്മിന്‍.

എന്നാല്‍ യാത്ര പറയാനായി മോഹന്‍ലാലിന് അടുത്തേക്ക് നിമിഷ എത്തിയപ്പോഴാണ് വന്‍ ട്വിസ്റ്റ് സംഭവിച്ചത്. നിമിഷ പുറത്തായില്ല. പുറത്തായി എന്നാണ് ഹൗസിലുള്ള മറ്റുള്ളവരോട് മോഹന്‍ലാല്‍ പറഞ്ഞിരിയ്ക്കുന്നത്. എന്നാല്‍ നിമിഷ ബിഗ്ഗ് ബോസ് ഹൗസിന് ഒരു ചുമരിന് അപ്പുറത്തെ രഹസ്യ മുറിയിലാണ്. അവിടെ ഇരുന്ന് കൊണ്ട് മറ്റ് മത്സരാര്‍ത്ഥികള്‍ പറയുന്നതും ചെയ്യുന്നതും എല്ലാം നിമിഷയ്ക്ക് ഒരു സ്‌ക്രീനില്‍ കാണാന്‍ സാധിയ്ക്കും. ഇനിയാണ് സംഗതി കളറാകാന്‍ പോകുന്നത്.