രാഷ്‌ട്രപതി തെരഞ്ഞെടുപ്പ്; ദ്രൗപതി മുർമുവിന്റെ വിജയം രാജ്യത്തെ ഒരു ലക്ഷം ഗോത്ര ഊരുകളിൽ ആഘോഷിക്കാൻ തീരുമാനിച്ച് ബിജെപി

ദില്ലി: രാഷ്‌ട്രപതി സ്ഥാനാർത്ഥി ദ്രൗപതി മുർമുവിന്റെ വിജയം രാജ്യത്തെ ഒരു ലക്ഷം ഗോത്ര ഊരുകളിൽ ആഘോഷിക്കാൻ തീരുമാനിച്ച് ബിജെപി. ഗോത്ര വിഭാഗത്തിൽ നിന്ന് രാഷ്‌ട്രപതി പദവിയിലെത്തുന്ന ആദ്യ വ്യക്തിയാണ് ദ്രൗപതി മുർമു. എൻഡിഎ സ്ഥാനാർത്ഥിയായ മുർമു നേരത്തെ വിജയം ഉറപ്പിച്ചിട്ടുണ്ട്. അതുകൊണ്ടു തന്നെ ഗോത്ര ജനതയ്‌ക്ക് ആത്മവിശ്വാസവും അഭിമാനവും പകരുന്ന വിജയമാക്കിക്കി മാറ്റാനാണ് ബിജെപി ഒരുങ്ങുന്നത് .

രാഷ്‌ട്രപതി തിരഞ്ഞെടുപ്പിന്റെ ഫലം പ്രഖ്യാപിക്കുന്ന ജൂലൈ 21 ന് തന്നെ ഇതിനുളള തീരുമാനവും ഔദ്യോഗികമായി പ്രഖ്യാപിച്ചേക്കുമെന്ന് റിപ്പോർട്ടുകളിൽ പറയുന്നു. രാജ്യത്തിന്റെ എല്ലാ മേഖലകളിലും ദ്രൗപതി മുർമുവിന്റെ തിരഞ്ഞെടുപ്പ് ആഘോഷമാക്കണമെന്നാണ് ബിജെപി നേതൃത്വം കീഴ്ഘടകങ്ങൾക്ക് നൽകിയിരിക്കുന്ന നിർദ്ദേശം. 15,000 മണ്ഡലങ്ങളിലും ഇതുമായി ബന്ധപ്പെട്ട ആഘോഷങ്ങൾ നടക്കും.

സാധാരണക്കാരായ ജനങ്ങൾക്ക് നല്ല സന്ദേശം നൽകുന്നതിന്റെ ഭാഗമായിട്ടാണ് ബിജെപി രാജ്യവ്യാപകമായി ഇത്തരമൊരു പരിപാടി ആസൂത്രണം ചെയ്യുന്നത്. ഗോത്ര ഗ്രാമങ്ങളിൽ ഉൾപ്പെടെ ദ്രൗപതി മുർമുവിന് അഭിനന്ദനം അറിയിച്ച് ഹോർഡിങ്ങുകളും പോസ്റ്ററുകളും ഉയർത്താനാണ് നീക്കം.