തമിഴ്‌നാട്ടിൽ ബിജെപി നേതാവിനെ വെട്ടിക്കൊലപ്പെടുത്തിയ സംഭവം; മലയാളിയുൾപ്പെടെ ആറ് പേർ അറസ്റ്റിൽ;വടിവാൾ ഉൾപ്പെടെയുള്ള മാരകായുധങ്ങളും കണ്ടെത്തി

ചെന്നൈ:തമിഴ്‌നാട്ടിൽ ബിജെപി പ്രാദേശിക നേതാവിനെ വെട്ടിക്കൊലപ്പെടുത്തിയ സംഭവത്തിൽ മലയാളിയുൾപ്പെടെ ആറ് പേർ അറസ്റ്റിൽ.ബിജെപി തിരുപ്പത്തൂർ നഗരസക്രട്ടറി പി.കാളികണ്ണനാണ് കൊല്ലപ്പെട്ടത്.

കേസിൽ കോട്ടയം സ്വദേശി ടി. അരുൺ, തിരുപ്പത്തൂർ സ്വദേശികളായ എസ്. ഹരി വിഘ്‌നേശ്, വി. അരുൺ കുമാർ, ആന്ധ്രാ സ്വദേശികളായ കെ. മണി കണ്ഠൻ, ആനന്ദ് എന്നിവരാണ് അറസ്റ്റിലായത്. ഇവർക്ക് പുറമേ പ്രായപൂർത്തിയാകാത്ത ആൺ കുട്ടിയെയും സംഭവവുമായി ബന്ധപ്പെട്ട് പോലീസ് അറസ്റ്റ് ചെയ്തിട്ടുണ്ട്. കൊലയ്‌ക്ക് ഉപയോഗിച്ച വടിവാൾ ഉൾപ്പെടെയുള്ള മാരകായുധങ്ങളും ഇവരുടെ പക്കൽ നിന്നും അന്വേഷണ സംഘം കണ്ടെടുത്തു.

കഴിഞ്ഞ ദിവസമായിരുന്നു അരുൺ ഉൾപ്പെട്ട ക്വട്ടേഷൻ സംഘം കാളികണ്ണനെ വെട്ടിക്കൊലപ്പെടുത്തിയത്. ഹരി വിഘ്‌നേഷും, കാളികണ്ണനും തമ്മിൽ നേരത്തെ തർക്കങ്ങൾ ഉണ്ടായിരുന്നു. ഇതിന്റെ തുടർച്ചയെന്നോണമായിരുന്നു കൊലപാതകം. കൂടുതൽ വിവരങ്ങൾക്കായി പ്രതികളെ വിശദമായി ചോദ്യം ചെയ്തുവരികയാണ്. കൊലയ്‌ക്ക് പിന്നിൽ രാഷ്‌ട്രീയ വൈരാഗ്യമുണ്ടോയെന്ന കാര്യവും പോലീസ് പരിശോധിക്കുന്നുണ്ട്.