ബിജെപി നേതാവ് ഉമാഭാരതിയുടെ ജീവന് ഭീഷണി? പോലീസ് ചമഞ്ഞ് പാകിസ്ഥാനിൽ നിന്നും ദുബായിൽ നിന്നും ഫോൺ! പോലീസ് അന്വേഷണം ആരംഭിച്ചു

ഭോപ്പാൽ: മദ്ധ്യപ്രദേശ് മുൻ മുഖ്യമന്ത്രിയും ബിജെപി നേതാവുമായ ഉമാഭാരതിയുടെ ജീവന് ഭീഷണി? ഉമാഭാരതിയുടെ സുരക്ഷാ ഉദ്യോഗസ്ഥന് പാകിസ്ഥാനിൽ നിന്നും ദുബായിൽ നിന്നും ഫോൺ കോളുകൾ ലഭിച്ചതായി റിപ്പോർട്ട്. വിളിച്ചവർ പോലീസ് ചമഞ്ഞ് ഭാരതിയുടെ സ്ഥലത്തെക്കുറിച്ച് ആവർത്തിച്ച് ചോദിച്ചു. ഇസഡ് പ്ലസ് സുരക്ഷയാണ് ബിജെപി നേതാവ് ഉമാഭാരതിക്കുള്ളത്. ക്രൈംബ്രാഞ്ചിൽ നിന്നുള്ളവരാണെന്ന് വിളിച്ചവർ സ്വയം പരിചയപ്പെടുത്തുകയും ചോദ്യം ചെയ്യാനായി ഉമാഭാരതിയുടെ സ്ഥലം അറിയണമെന്ന് ആവശ്യപ്പെടുകയും ചെയ്തു എന്നാണ് വിവരം. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.

രണ്ട് വാട്ട്‌സ്ആപ്പ് നമ്പറുകൾ വഴിയാണ് പോലീസ് ചമഞ്ഞ് ഫോൺ കോളുകൾ വന്നത്. ഈ നമ്പറുകളുടെ ട്രൂകോളർ ഐഡികൾ പരിശോധിച്ചപ്പോൾ ഒന്ന് പാകിസ്ഥാനിൽ നിന്നുള്ള എം ഹുസൈൻ്റേതും മറ്റൊന്ന് ദുബായിൽ നിന്നുള്ള അബ്ബാസിൻ്റേതുമാണെന്ന് കണ്ടെത്തിയതായി പോലീസ് പ്രസ്താവനയിൽ പറയുന്നു. വാട്ട്‌സ്ആപ്പ് നമ്പറുകളും പേരുകളും ഉൾപ്പെടെയുള്ള മുഴുവൻ വിവരങ്ങളും സുരക്ഷയ്ക്കായി വിന്യസിച്ച ഇൻസ്പെക്ടർ ഉടൻ തന്നെ ഡയറക്ടർ ജനറൽ ഓഫ് പോലീസ്, എഡിജി (ഇൻ്റലിജൻസ്) എന്നിവർക്ക് അയച്ചു. തുടർന്ന് ക്രൈംബ്രാഞ്ച് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. വിളിച്ചവരുടെ ലൊക്കേഷൻ കണ്ടെത്താൻ സൈബർ സെല്ലിൻ്റെ നേതൃത്വത്തിലും അന്വേഷണം നടത്തും.