ദില്ലി : രാജ്യത്ത് ഇന്ധന വില കുതിച്ചുയരുന്നതിനിടെ പെട്രോളിന്റെയും ഡീസലിന്റെയും വില കുറച്ച് അസമും മേഘാലയയും. പെട്രോളിനും ഡീസലിനും ലിറ്ററിന് അഞ്ചു രൂപവീതം കുറയ്ക്കുമെന്ന് അസം ധനമന്ത്രി ഹിമന്ത ബിസ്വ സർമ നിയമസഭയിൽ അറിയിച്ചു. അതേസമയം മേഘാലയയിൽ പെട്രോളിനും ഡീസലിനും ലിറ്ററിന് രണ്ട് രൂപ വീതം കുറയ്ക്കുമെന്നാണ് മുഖ്യമന്ത്രി കൊൺറാഡ് കെ സാങ്മ അറിയിച്ചിരിക്കുന്നത്. പുതുക്കിയ നിരക്ക് അസമിൽ അർദ്ധരാത്രിയോടെയും മേഘാലയയിൽ തിങ്കളാഴ്ച്ചയും നിലവിൽ വരും. രണ്ടിടത്തും ബി ജെ പി യാണ് ഭരിക്കുന്നത് .മദ്യത്തിന്റെ നികുതിയിൽ അസം സർക്കാർ 25 ശതമാനം കുറവ് വരുത്തിയിരുന്നു. ഭരണത്തുടർച്ച ലഭിക്കുമെന്നാണ് സർബാനന്ദ സോനോവാളിന്റെ നേതൃത്വത്തിലുള്ള ബിജെപി സർക്കാരിന്റെ പ്രതീക്ഷ. പെട്രോൾ വില കുറച്ചിരിക്കുന്ന മേഘാലയയിലും ബിജെപിയുടെ പിന്തുണയുളള സർക്കാരാണ് ഭരണം നടത്തുന്നത്.