ബ്രിട്ടീഷ് രാജാവിന് അർബുദ ബാധ; എത്രയും വേ​ഗം സുഖം പ്രാപിക്കട്ടെയെന്ന് പ്രധാനമന്ത്രി നരേന്ദ്രമോദി

ദില്ലി: കാൻസർ സ്ഥിരീകരിച്ച ബ്രിട്ടീഷ് രാജാവ് ചാൾസ് മൂന്നാമൻ എത്രയും വേ​ഗം സുഖം പ്രാപിക്കട്ടെയെന്ന് പ്രധാനമന്ത്രി നരേന്ദ്രമോദി. ആരോ​ഗ്യവാനായി വേ​ഗം തിരിച്ചെത്തട്ടെയെന്നും അദ്ദേഹം സമൂഹമാദ്ധ്യമമായ എക്സിൽ കുറിച്ചു. കഴിഞ്ഞ ദിവസം രാത്രിയായിരുന്നു ബ്രിട്ടീഷ് രാജാവിന് അർബുദം സ്ഥിരീകരിച്ച വാർത്ത പുറത്തുവന്നത്. ബക്കിങ്ഹാം കൊട്ടാരം തന്നെയാണ് രോഗവിവരം പരസ്യപ്പെടുത്തിയത്. അഭ്യൂഹങ്ങൾ ഒഴിവാക്കാനായി രാജാവിന്റെ ആഗ്രഹ പ്രകാരം രോഗവിവരം പരസ്യപ്പെടുത്തുകയാണെന്ന് കൊട്ടാരം വാർത്താക്കുറിപ്പിൽ വിശദീകരിച്ചിരുന്നു.

https://x.com/narendramodi/status/1754730459429278192?s=20

ഏതാനും നാളുകൾക്ക് മുമ്പ് പ്രോസ്റ്റേറ്റ് ​ഗ്രന്ഥിയുടെ വികാസവുമായി ബന്ധപ്പെട്ട പ്രയാസങ്ങൾ മൂലം ചാൾസ് രാജാവിനെ ആശുപത്രിയിൽ പ്രവേശിപ്പിച്ചിരുന്നു. ഇതിന്റെ ഭാ​ഗമായി നടത്തിയ വിശദമായ പരിശോധനയിലാണ് അദ്ദേഹത്തിന് കാൻസർ ബാധിച്ചിട്ടുണ്ടെന്ന് കണ്ടെത്തിയത്. ചികിത്സ തുടങ്ങുന്നതോടെ ഔദ്യോ​ഗിക ചുമതലകളിൽ നിന്ന് അദ്ദേഹം താത്കാലികമായി വിട്ടുനിൽക്കും.