പ്രധാനമന്ത്രി പദവിയിൽ ലാവിഷായി ഋഷി സുനക് ; സ്വകാര്യ ജെറ്റ് യാത്രയ്ക്കായി പൊടിച്ചത് ഖജനാവിൽ നിന്ന് 5 ലക്ഷം യൂറോ

ലണ്ടൻ : യുകെ പ്രധാനമന്ത്രി ഋഷി സുനക് കഴിഞ്ഞ വർഷം യാത്രക്കായി സ്വകാര്യ ജെറ്റ് ഉപയോഗിച്ചതിലൂടെ 5 ലക്ഷം യൂറോ പൊതു ഖജനാവിൽ നിന്ന് ചെലവായതായി ബ്രിട്ടൺ ആസ്ഥാനമായി പ്രവർത്തിക്കുന്ന പ്രമുഖ മാദ്ധ്യമം റിപ്പോർട്ട് ചെയ്തു. പലപ്പോഴായി ചെയ്ത ഒരാഴ്ചയിലേറെ ദൈർഖ്യമുള്ള യാത്രയ്ക്കാണ് ഇത്രയും ഉയർന്ന തുക ചിലവാക്കിയിരിക്കുന്നത്. ഈജിപ്തിലെ കാലാവസ്ഥാ ഉച്ചകോടിയിൽ (സിഒപി27) പങ്കെടുത്ത് പിറ്റേദിവസം തിരിച്ചെത്തിയ യാത്രയ്ക്ക് സുനക് സ്വകാര്യ ജെറ്റ് തിരഞ്ഞെടുത്തത്തിലൂടെ 1.08 ലക്ഷം യൂറോ സർക്കാരിന് ചെലവഴിക്കേണ്ടി വന്നു.

ഒരാഴ്ചയ്ക്കുശേഷം ഇന്തൊനീഷ്യയിലെ ബാലിയിലേക്ക് ജി20 ഉച്ചകോടിക്കായി വീണ്ടും സ്വകാര്യ ജെറ്റിൽ സുനക് പറന്നതിന്റെ ചെലവ് 3.40 ലക്ഷം യൂറോയാണ്. ഡിസംബറിൽ ലാത്‌വിയയിലേക്കും എസ്റ്റോണിയയിലേക്കും നടത്തിയ യാത്രയ്ക്ക് 62,498 യൂറോയും വ്യക്തിഗത ചെലവായി 2500 യൂറോയും പൊതു ഖജനാവിന് നഷ്ടമായി.

യാത്രകളിൽ പ്രധാനമന്ത്രിയെ അനുഗമിക്കുന്ന മറ്റ് ഉദ്യോഗസ്ഥരുടെ ചെലവുകളെക്കുറിച്ച് പുറത്തുവന്ന രേഖയിൽ സൂചനയില്ല. ബാലിയിലെ പരിപാടിയിൽ കുറഞ്ഞത് 35 ഉദ്യോഗസ്ഥർ സുനകിനൊപ്പം പങ്കെടുത്തിരുന്നു. യുകെയിലെ മാദ്ധ്യമപ്രവർത്തകരും വിമാനയാത്രകളിൽ പ്രധാനമന്ത്രിയെ അനുഗമിക്കാറുണ്ട്. എന്നാൽ ഇവർ ടിക്കറ്റ് എടുത്താണ് യാത്ര ചെയ്യുക.

പാസഞ്ചർ യാത്രകൾക്കായി തയാറാക്കപ്പെട്ടിരിക്കുന്ന ആർഎഎഫ് വോയേജർ വിമാനം പ്രധാനമന്ത്രിയുടെ ഓഫിസിനു ഉപയോഗിക്കാമെങ്കിലും റിപ്പോർട്ടിൽ പറഞ്ഞിരിക്കുന്ന എല്ലാ യാത്രകളും ടൈറ്റൻ എയർവേസിന്റെ ചാർട്ടേഡ് എയർബസ് എ321ൽ ആണ് നടത്തിയിരിക്കുന്നത്. വിമാനങ്ങളുടെ ടെയിൽ ഫിന്നിൽ ബ്രിട്ടന്റെ യൂണിയൻ പതാകയും അധികൃതർ ഉൾപ്പെടുത്തിയിട്ടുണ്ട്.