ബ്രസൽസ് ഭീകരാക്രമണം; രണ്ട് സ്വീഡിഷ് പൗരന്മാരെ കൊലപ്പെടുത്തിയ ഐഎസ് ഭീകരനെ വധിച്ച് പോലീസ്; ആയുധങ്ങൾ കണ്ടെടുത്തു

ബ്രസൽസ്: ഭീകരാക്രമണത്തിൽ രണ്ട് സ്വീഡിഷ് പൗരന്മാരെ കൊലപ്പെടുത്തിയ ഐഎസ് ഭീകരനെ വെടിവെച്ച് കൊന്ന് പോലീസ്. ഭീകരന്റെ പക്കൽ നിന്നും ആയുധങ്ങൾ കണ്ടെത്തിയതായി പോലീസ് അറിയിച്ചു. സിസിടിവി ദൃശ്യങ്ങൾ കേന്ദ്രികരിച്ചാണ് ഭീകരനെ പോലീസ് കണ്ടെത്തിയത്.

കഴിഞ്ഞ ദിവസമാണ് ഭീകരാക്രമണത്തിൽ സ്വീഡിഷ് ഫുഡ്‌ബോൾ ആരാധകരായ രണ്ട് പേർ കൊല്ലപ്പെടുന്നത്. ആക്രമണത്തിൽ മറ്റൊരാൾക്കും പരിക്കേറ്റിരുന്നു. ഇതേ തുടർന്ന് യൂറോ കപ്പ് യോഗ്യതാ മത്സരവും ഉപേക്ഷിച്ചിരുന്നു. ബെൽജിയം-സ്വീഡൻ മത്സരമാണ് പാതി വഴിയിൽ ഉപേക്ഷിച്ചത്. മത്സരം കാണാനെത്തിയവരെ സുരക്ഷയുടെ ഭാഗമായി സ്റ്റേഡിയത്തിൽ പിടിച്ചിരുത്തുകയും ചെയ്തു. ഭീകരാന്തരീക്ഷം കെട്ടടങ്ങിയതിന് ശേഷമാണ് ഇവരെ പിന്നീട് പുറത്തേക്ക് വിട്ടത്.

അതേസമയം, ആക്രമണം നടന്ന ബ്രസൽസിന്റെ സമീപ പ്രദേശത്ത് നിന്ന് തന്നെയാണ് ഭീകരനെ പോലീസിന് കീഴ്‌പ്പെടുത്താൻ സാധിച്ചത്. ഏറെ നേരത്തെ ഏറ്റുമുട്ടലിനൊടുവിലാണ് ഭീകരനെ പോലീസ് വധിച്ചതെന്ന് അധികൃതർ അറിയിച്ചു.