ചന്ദ്രന്റെ ദക്ഷിണ ധ്രുവത്തിൽ സൾഫർ സാന്നിദ്ധ്യം സ്ഥിരീകരിച്ച് ചന്ദ്രയാൻ – 3; അലുമിനിയം, കാത്സ്യം, ക്രോമിയം മൂലകങ്ങളുടെ സാന്നിദ്ധ്യവും സ്ഥിരീകരിച്ചു; ഹൈഡ്രജൻ കണ്ടെത്താൻ ശ്രമം തുടരുന്നു; മൂലകങ്ങളുടെ സാന്നിദ്ധ്യം സ്ഥിരീകരിച്ചത് ഐഎസ്ആർഒ തദ്ദേശീയമായി നിർമ്മിച്ച ലിബ്സ് ഉപകരണം

ബെംഗളൂരു : ചന്ദ്രന്റെ ദക്ഷിണ ധ്രുവത്തിൽ സൾഫറിന്റെ സാന്നിധ്യം സ്ഥിരീകരിച്ച് ഭാരതത്തിന്റെ അഭിമാന ദൗത്യമായ ചന്ദ്രയാൻ 3 . യ പ്രഗ്യാൻ റോവറിലുള്ള ലേസർ ഇൻഡ്യൂസ്ഡ് ബ്രേക്ഡൗൺ സ്പെക്ട്രോസ്കോപ് (ലിബ്സ്) എന്ന ശാസ്ത്രീയ ഉപകരണമാണ് ചന്ദ്രന്റെ ദക്ഷിണ ധ്രുവത്തിൽ സൾഫറിന്റെ സാന്നിധ്യം സ്ഥിരീകരിച്ചത്. അലുമിനിയം, കാത്സ്യം , ക്രോമിയം, ഇരുമ്പ്, ടൈറ്റാനിയം, സിലിക്കണ്‍, മഗ്നീഷ്യം എന്നീ മൂലകങ്ങളുടെ സാന്നിധ്യവും ഉപകരണം സ്ഥിരീകരിച്ചിട്ടുണ്ട്. പൂർണ്ണമായും തദ്ദേശീയമായി നിർമ്മിച്ച ഉപകരണമാണ് ലേസർ ഇൻഡ്യൂസ്ഡ് ബ്രേക്ഡൗൺ സ്പെക്ട്രോസ്കോപ് എന്നത് നേട്ടത്തിന്റെ തിളക്കം വർധിപ്പിക്കുന്നു.ചന്ദ്രോപരിതലത്തിലെ മണ്ണിൽ നേരിട്ട് പരീക്ഷണം നടത്തി ഇവയുടെ സാന്നിധ്യം സ്ഥിരീകരിക്കുന്നത് ഇതാദ്യമാണ്. ഇക്കാര്യങ്ങൾ വിശദീകരിച്ച് ഐഎസ്ആർഒ എക്സ് പ്ലാറ്റ്ഫോമിൽ (ട്വിറ്റർ) കുറിപ്പ് പങ്കുവച്ചിട്ടുണ്ട്. ഹൈഡ്രജൻ ഉണ്ടോ എന്നു കണ്ടെത്താനുള്ള പരിശോധന തുടരുകയാണെന്നും ഐഎസ്ആർഒ അറിയിച്ചു.

ചന്ദ്രനിലെ മണ്ണിലും പാറകളിലും അടങ്ങിയിരിക്കുന്ന മഗ്ന‍ീഷ്യം, അലുമിനിയം, സിലിക്കൺ, പൊട്ടാസ്യം, കാത്സ്യം , ടൈറ്റാനിയം, ഇരുമ്പ് തുടങ്ങിയ മൂലകങ്ങളുടെ തന്മാത്രാ ഘടനയെക്കുറിച്ചാണ് ലിബ്സ് പഠിക്കുന്നത്. ഇതിനിടെയാണ് സൾഫർ ഉൾപ്പെടെയുള്ളവയുടെ സാന്നിധ്യം സ്ഥിരീകരിച്ചത്.

അതേസമയം ചന്ദ്രയാൻ-3 ദൗത്യത്തിന്റെ ഭാഗമായി മനുഷ്യകുലത്തിന് അപരിചിതമായിരുന്ന ചന്ദ്രന്റെ ദക്ഷിണ ധ്രുവത്തിൽ വിക്രം ലാൻഡർ സേഫ് ലാൻഡിംഗ് ചെയ്തിട്ട് നാളെ ഒരാഴ്ച തികയും.ഈ മാസം 23 ന് ഇന്ത്യൻ സമയം വൈകുന്നേരം 6. 04 നാണ് വിക്രം ലാൻഡർ ചന്ദ്രന്റെ മണ്ണിൽ സുരക്ഷിതമായി നിലത്തിറങ്ങിയത്. ഒരു ചാന്ദ്ര ദിനം അതായത് ഭൂമിയിലെ 14 ദിനമാണ് റോവറിന്റെ ആയുസ്. അതിനാൽ തന്നെ സമയത്തിനെതിരായ ഓട്ടത്തിലാണ് പ്രഗ്യാൻ എന്ന് സ്പേസ് ആപ്ലിക്കേഷൻസ് സെന്റർ (എസ്എസി) ഡയറക്ടർ നിലേഷ് എം ദേശായി വ്യക്തമാക്കി. ചന്ദ്രന്റെ ദക്ഷിണധ്രുവത്തിലെ അജ്ഞാതമായ ഭൂപ്രദേശത്തിലൂടെ ആറ് ചക്രങ്ങളുമായി നീങ്ങുന്ന റോവറിനെ നിയന്ത്രിക്കാനും വേണ്ടത്ര ശാസ്ത്രീയ പരിശോധനകൾ നടത്താനും ഐഎസ്ആർഒ ശാസ്ത്രജ്ഞർ രാപ്പകൽ പ്രയത്നിക്കുകയാണ്.