പി.എസ്‌.സിയിലുള്ള ജനവിശ്വാസം തകർന്നു; കമ്മീഷൻ പിരിച്ചുവിടണം, സിബിഐ അന്വേഷണം വേണം”: പി.കെ. കൃഷ്ണദാസ്

തിരുവനന്തപുരം: പബ്ലിക് സർവീസ് കമ്മീഷനിലുള്ള ജനങ്ങളുടെ വിശ്വാസം പൂർണമായും നഷ്ടപ്പെട്ട സാഹചര്യത്തിൽ കമ്മീഷൻ പിരിച്ചുവിടാൻ മുഖ്യമന്ത്രി തയ്യാറാകണമെന്ന് ബിജെപി ദേശീയ നിർവാഹക സമിതി അംഗം പി.കെ. കൃഷ്ണദാസ് ആവശ്യപ്പെട്ടു.
പിണറായി വിജയൻ സർക്കാരിന്റെ കാലത്ത് പിഎസ്‌സിയിൽ നടന്ന എല്ലാ ക്രമക്കേടുകളെക്കുറിച്ചും സിബിഐ അന്വേഷണം പ്രഖ്യാപിക്കണമെന്നും അദ്ദേഹം വാർത്താസമ്മേളനത്തിൽ ആവശ്യപ്പെട്ടു. നിലവിൽ നടക്കുന്ന ക്രൈംബ്രാഞ്ച് അന്വേഷണം ഏറ്റവും ഒടുവിൽ പുറത്തുവന്ന ക്രമക്കേടുകളിലേക്ക് മാത്രമാണ് പരിമിതപ്പെടുന്നതെന്നും, അത് മഞ്ഞുമലയുടെ അറ്റം മാത്രമാണെന്നും അദ്ദേഹം ആരോപിച്ചു.

ഡൽഹിയിൽ പരീക്ഷാ ക്രമക്കേടിനെതിരെ സമരം നടത്തിയ ഇടത്-വലത് നേതാക്കൾ കേരളത്തിലെ പിഎസ്‌സി വിഷയത്തിൽ മൗനം പാലിക്കുകയാണെന്നും സെക്രട്ടേറിയറ്റിന് മുന്നിൽ ഒരു മാസത്തിലേറെയായി സമരം നടത്തുന്ന ഉദ്യോഗാർഥികളെ അവഗണിക്കുകയാണെന്നും കൃഷ്ണദാസ് വിമർശിച്ചു. കഴിഞ്ഞ പത്ത് വർഷത്തിനിടെ സിപിഎം പിഎസ്‌സിയെ പൂർണമായും തകർത്തുവെന്നും സഹകരണ സ്ഥാപനങ്ങളിലെന്ന പോലെ പിഎസ്‌സിയിലും പാർട്ടി പ്രവർത്തകരെയും നേതാക്കളുടെ ബന്ധുക്കളെയും നിയമവിരുദ്ധമായി നിയമിച്ചുവെന്നുമാണ് അദ്ദേഹത്തിന്റെ ആരോപണം.

പ്രതിപക്ഷ നേതാവ് വി.ഡി. സതീശൻ മുമ്പ് പിഎസ്‌സി ക്രമക്കേടുകൾക്കെതിരെ നിയമസഭയിൽ ശക്തമായി പ്രതികരിച്ചിരുന്നുവെങ്കിലും ഇപ്പോൾ മൗനം പാലിക്കുകയാണെന്നും കൃഷ്ണദാസ് പറഞ്ഞു. മുഖ്യമന്ത്രി പിണറായി വിജയനും വി.ഡി. സതീശനും തമ്മിലുള്ള രാഷ്ട്രീയ ധാരണ ഇപ്പോഴും തുടരുകയാണെന്നും അദ്ദേഹം ആരോപിച്ചു. പിഎസ്‌സി നിയമനങ്ങളുമായി ബന്ധപ്പെട്ട് വ്യാപകമായ സാമ്പത്തിക ഇടപാടുകൾ നടന്നിട്ടുണ്ടോയെന്നും സിപിഎമ്മിനും ഡിവൈഎഫ്‌ഐക്കും ഇതിൽ പങ്കുണ്ടോയെന്നും കേന്ദ്ര ഏജൻസികൾ അന്വേഷിക്കണമെന്ന് അദ്ദേഹം ആവശ്യപ്പെട്ടു. കഴിഞ്ഞ പത്ത് വർഷത്തിനിടെ നടന്ന എല്ലാ പിഎസ്‌സി നിയമനങ്ങളും സമഗ്രമായി കേന്ദ്ര അന്വേഷണ ഏജൻസിയുടെ പരിധിയിൽ കൊണ്ടുവരണമെന്നും കൃഷ്ണദാസ് ആവശ്യപ്പെട്ടു.