കുട്ടിയെ തട്ടിക്കൊണ്ടുപോകൽ; കുഞ്ഞ് മരിക്കാൻ സാധ്യതയുണ്ടായിരുന്നെന്ന് റിമാൻഡ് റിപ്പോർട്ട്; പ്രതി ഹസനെ ഇന്ന് പോലീസ് കസ്റ്റഡിയിൽ വാങ്ങിയേക്കും

തിരുവനന്തപുരം: പേട്ടയിൽ നിന്നും കുഞ്ഞിനെ തട്ടിക്കൊണ്ടുപോയി വിജനമായ സ്ഥലത്ത് ഉപേക്ഷിക്കപ്പെട്ടതിനാൽ ഭയം കാരണം കുട്ടിക്ക് ന്യൂറോജനിക് ഷോക്ക് സംഭവിക്കാമെന്ന് ഡോക്ടർമാർ വിലയിരുത്തിയതായി റിമാൻഡ് റിപ്പോർട്ട്. കുഞ്ഞിനെ തട്ടിക്കൊണ്ടുപോയി ഉപേക്ഷിച്ച കേസിലെ പ്രതി ഹസൻകുട്ടിയുടെ ഇന്ന് പോലീസ് കസ്റ്റഡിയിൽ വാങ്ങിയേക്കും. വർക്കല അയിരൂർ സ്വദേശിയാണ് പ്രതി. കരഞ്ഞ് ഒച്ചവെച്ച കുട്ടിയുടെ വായും മൂക്കും പ്രതി കൂട്ടിപ്പിടിച്ചതിനാൽ മരണം വരെ സംഭവിച്ചേക്കുമായിരുന്നു എന്ന കാരണത്താൽ പ്രതിക്കെതിരേ വധശ്രമക്കുറ്റംകൂടി ചുമത്തിയിട്ടുണ്ട്.

നിർജലീകരണം കാരണം കുട്ടിയുടെ ശരീരത്തിൽ ക്രിയാറ്റിൻ, യൂറിയ ലെവൽ കൂടിയിരുന്നതിനാൽ കുട്ടിയുടെ വൃക്കയ്ക്കു തകരാർ സംഭവിച്ച് മരിച്ചുപോകാൻ സാധ്യതയുണ്ടായിരുന്നതായും റിപ്പോർട്ടിലുണ്ട്. പ്രതി ഹസൻകുട്ടിയെ അഡീഷണൽ ചീഫ് ജുഡീഷ്യൽ മജിസ്ട്രേറ്റ് എൽസ കാതറിൻ ജോർജ് 18 വരെയാണ് റിമാൻഡ് ചെയ്തത്.

ഫെബ്രുവരി 18-നാണ് ഓൾ സെയ്ന്റ്സ് കോളേജിനു സമീപത്തുനിന്ന് പ്രതി കുട്ടിയെ തട്ടിക്കൊണ്ടുപോയത്. വധശ്രമത്തിനു പുറമേ കുട്ടിയെ പീഡിപ്പിക്കണമെന്നും പ്രതിക്ക് ഉദ്ദേശ്യമുണ്ടായതിനാൽ പോക്സോ നിയമപ്രകാരമുള്ള കുറ്റങ്ങളും ചുമത്തി.