ഷക്സ്ഗാം താഴ്‌വരയിൽ പ്രകോപനവുമായി ചൈന! വീണ്ടും നിർമ്മാണ പ്രവർത്തനങ്ങൾ ; നിയമവിരുദ്ധമെന്ന് ഇന്ത്യ

ദില്ലി : ലഡാക്കിലെ അതിർത്തി തർക്കങ്ങൾ പരിഹരിക്കാൻ നീക്കങ്ങൾ നടക്കുന്നതിനിടെ, ഷക്സ്ഗാം താഴ്‌വരയിൽ അവകാശവാദമുന്നയിച്ച് ചൈന വീണ്ടും രംഗത്ത്. ജമ്മു കശ്മീരിന്റെ ഭാഗമായ ഷക്സ്ഗാം താഴ്‌വരയിൽ ചൈന നടത്തുന്ന അടിസ്ഥാന സൗകര്യ വികസന പദ്ധതികൾ ചോദ്യം ചെയ്യപ്പെടാനാവാത്തതാണെന്ന് ചൈന പ്രസ്താവനയിറക്കി. ചൈനയുടെ പ്രകോപനപരമായ വാദങ്ങളെ ഇന്ത്യ തള്ളിക്കളഞ്ഞു. ഷക്സ്ഗാം താഴ്‌വര ഇന്ത്യയുടെ അവിഭാജ്യ ഘടകമാണെന്നും അവിടെ പാകിസ്ഥാന്റെ സഹായത്തോടെ ചൈന നടത്തുന്ന നിർമ്മാണങ്ങൾ നിയമവിരുദ്ധമാണെന്നും വിദേശകാര്യ മന്ത്രാലയം പ്രതികരിച്ചു.

കാരക്കോറം പർവതനിരകൾക്ക് വടക്കായി സ്ഥിതി ചെയ്യുന്ന തന്ത്രപ്രധാനമായ ഈ പ്രദേശം 1963-ലെ അതിർത്തി കരാർ പ്രകാരം പാകിസ്ഥാൻ ചൈനയ്ക്ക് വിട്ടുനൽകിയതാണ്. എന്നാൽ ഈ കരാർ ഇന്ത്യ ഇതുവരെ അംഗീകരിച്ചിട്ടില്ല. ഷക്സ്ഗാം താഴ്‌വരയിലൂടെ കടന്നുപോകുന്ന ചൈന-പാകിസ്ഥാൻ സാമ്പത്തിക ഇടനാഴിയും (CPEC) ഇന്ത്യയുടെ പരമാധികാരത്തിന്മേലുള്ള കടന്നുകയറ്റമാണെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ പറഞ്ഞു. രാജ്യത്തിന്റെ താൽപ്പര്യങ്ങൾ സംരക്ഷിക്കുന്നതിന് ആവശ്യമായ ഏത് നടപടിയും സ്വീകരിക്കാൻ ഇന്ത്യക്ക് അവകാശമുണ്ടെന്നും അദ്ദേഹം ഓർമ്മിപ്പിച്ചു.

സിയാച്ചിൻ ഗ്ലേസിയറിന് തൊട്ടടുത്തായി ചൈന പുതിയ റോഡുകൾ നിർമ്മിക്കുന്നത് ഇന്ത്യയുടെ സുരക്ഷയ്ക്ക് ഭീഷണിയാണെന്ന് പ്രതിരോധ വിദഗ്ധർ ചൂണ്ടിക്കാട്ടുന്നു. 2017-ലെ ദോക്ലാം സംഘർഷത്തിന് ശേഷം ഈ മേഖലയിൽ ചൈനയുടെ നിർമ്മാണ പ്രവർത്തനങ്ങൾ ഗണ്യമായി വർദ്ധിച്ചിട്ടുണ്ട്. സമുദ്രനിരപ്പിൽ നിന്ന് 16,000 അടി ഉയരത്തിൽ വരെ നീളുന്ന ഈ നിർമ്മാണങ്ങൾ ലഡാക്ക് മേഖലയിലെ ഇന്ത്യൻ പ്രതിരോധ നിരയെ സമ്മർദ്ദത്തിലാക്കാനുള്ള നീക്കമായാണ് വിലയിരുത്തപ്പെടുന്നത്. അതിർത്തിയിൽ സമാധാനം പുനഃസ്ഥാപിക്കാൻ ചർച്ചകൾ തുടരുമ്പോഴും ചൈന നടത്തുന്ന ഇത്തരം ഏകപക്ഷീയമായ നീക്കങ്ങൾ ഉഭയകക്ഷി ബന്ധത്തെ വീണ്ടും വഷളാക്കുകയാണ്.