ബെന്‍ ഗുരിയോന്‍ വിമാനത്താവളത്തിലോ യുഎസ് ബേസിലോ ഇടിച്ചിറക്കാന്‍ പദ്ധതി. ഫ്‌ലൈദുബായ് വിമാനം റാഞ്ചാന്‍ ശ്രമിച്ച ഒമാനി സഹ പൈലറ്റിന്റെ ഞെട്ടിയ്ക്കുന്ന മൊഴി പുറത്ത്

റിയാദ് : ദുബായ്-ടെല്‍ അവീവ് ഫ്‌ലൈദുബായ് വിമാനത്തിലുണ്ടായ ഞെട്ടിക്കുന്ന ആക്രമണ സംഭവത്തിന് പിന്നിലെ യഥാര്‍ത്ഥ ലക്ഷ്യം വെളിപ്പെടുത്തി പ്രതിയായ ഒമാനി സഹ പൈലറ്റ് ഹമാം അല്‍ ഹമ്മാമി. വിമാനം റാഞ്ചി ഇസ്രയേലിലെ ബെന്‍ ഗുരിയോന്‍ വിമാനത്താവളത്തില്‍ ഇടിച്ചിറക്കാനായിരുന്നു ഇയാളുടെ പദ്ധതിയെന്ന് ചോദ്യംചെയ്യലില്‍ വ്യക്തമായി. ബെന്‍ ഗുരിയോനില്‍ വിമാനം ലാന്‍ഡ് ചെയ്യാന്‍ ആവശ്യപ്പെടുകയും അവിടെ വെച്ച് വന്‍ ആക്രമണം നടത്തുകയുമായിരുന്നു ലക്ഷ്യം.

തന്റെ പദ്ധതി കൃത്യമായി നടപ്പിലാകുമെന്നും, ഇടയില്‍ ആരും തടസ്സമായി നില്‍ക്കില്ലെന്നും ഹമ്മാമി അടിയുറച്ച് വിശ്വസിച്ചിരുന്നു. ഒരുപക്ഷേ വിമാനത്താവളത്തില്‍ ഇടിച്ചിറക്കാന്‍ കഴിഞ്ഞില്ലെങ്കില്‍, ടെല്‍ അവീവിലെ ഏതെങ്കിലും പ്രധാന കെട്ടിടത്തിലോ ജോര്‍ദാനിലെ യു.എസ്. സൈനിക താവളത്തിലോ കൊണ്ടുപോയി വിമാനം ഇടിച്ചിറക്കാനും ഇയാള്‍ പദ്ധതിയിട്ടിരുന്നു.

എന്നാല്‍, ആക്രമണത്തിനിരയായി ഗുരുതരമായി പരിക്കേറ്റിട്ടും ഇന്ത്യന്‍ ക്യാപ്റ്റന്‍ സ്മിത് മച്ചാര്‍ കാണിച്ച അസാധാരണമായ ചെറുത്തുനില്‍പ്പും, കോക്പിറ്റില്‍ നിന്ന് നല്‍കിയ അപായ സിഗ്‌നലുകളും ഹമ്മാമിയുടെ പ്രതീക്ഷകള്‍ തകര്‍ത്തുതരിപ്പണമാക്കി. ഇതിനിടെ ക്യാബിന്‍ ക്രൂവും യാത്രക്കാരും കോക്പിറ്റിലേക്ക് ഇരച്ചെത്തുകയും സഹപൈലറ്റിനെ കീഴ്‌പ്പെടുത്തുകയും ചെയ്യുകയായിരുന്നു.