മാനേജര്‍ ജോലി ആഗ്രഹിച്ചെത്തിയ യുവതി ചെന്നുപെട്ടത് നരകയാതനയിലേക്ക്. കളമശേരിയില്‍ ലഹരിനല്‍കി തടങ്കലില്‍ വെച്ച് മാറിമാറി പീഡിപ്പിച്ചത് ഒരു സ്ത്രീയടക്കമുള്ള സംഘം

കൊച്ചി : കളമശേരിയില്‍ യുവതി കൂട്ടബലാത്സംഗത്തിന് ഇരയായ സംഭവത്തില്‍ ഞെട്ടിപ്പിക്കുന്ന വിവരങ്ങളാണ് പുറത്തുവന്നിരിക്കുന്നത്. മയക്കുമരുന്നും മദ്യവും നല്‍കി, രണ്ട് ദിവസം തടങ്കലില്‍ വെച്ച് മാറിമാറി അതിക്രൂരമായി പീഡിപ്പിച്ചു എന്നാണ് വിവരം.

കഴിഞ്ഞ സെപ്റ്റംബര്‍ രണ്ട്, മൂന്ന് തീയതികളിലാണ് ഈ ക്രൂരകൃത്യം നടന്നത്. യുവതിയെ ലൈംഗികമായി ഉപദ്രവിച്ചവരില്‍ ഒരു സ്ത്രീയും ഉള്‍പ്പെട്ടിട്ടുണ്ടെന്ന് പൊലീസ് വ്യക്തമാക്കി. കേസില്‍ യുവതിയടക്കം രണ്ട് പേരെക്കൂടി ഇനി പിടികൂടാനുണ്ട്. ക്രൂരമായ പീഡനത്തിന് ഇരയായ യുവതി നിലവില്‍ ആശുപത്രിയില്‍ ചികിത്സയില്‍ തുടരുകയാണ്.

സംഭവവുമായി ബന്ധപ്പെട്ട് ശ്രീരാഗ്, ജിത്തു എന്നീ പ്രതികളെ ഇന്നലെ പൊലീസ് പിടികൂടിയിരുന്നു. കോടതിയില്‍ ഹാജരാക്കിയ ഇവരെ റിമാന്‍ഡ് ചെയ്തിരിക്കുകയാണ്. യുവതിയെ ഉപദ്രവിച്ച ശേഷം പ്രതികള്‍ അവിടത്തെ ദൃശ്യങ്ങളും ക്യാമറയില്‍ പകര്‍ത്തിയിട്ടുണ്ട്.

കൊച്ചിയില്‍ ഭര്‍ത്താവിനൊപ്പം താമസിക്കുന്ന യുവതിയാണ് ഈ അതിക്രമത്തിന് ഇരയായത്. സ്പായില്‍ മാനേജര്‍ ജോലിക്ക് ആളുണ്ടെന്നുള്ള പരസ്യം കണ്ട് ഇന്റര്‍വ്യൂവിനായി എത്തിയപ്പോഴാണ് യുവതി ചതിയില്‍പ്പെട്ടത്. ഇന്റര്‍വ്യൂവിന് വിളിച്ചുവരുത്തിയ ശേഷമായിരുന്നു പ്രതികള്‍ കൂട്ടബലാത്സംഗം നടത്തിയത്.