‘ഇന്ത്യയുടെ പരമാധികാരത്തെയും പ്രാദേശിക അഖണ്ഡതയെയും മറ്റ് രാജ്യങ്ങൾ അംഗീകരിക്കണം’; പാംഗോങ് തടാകത്തിന് മുകളിലൂടെ ചൈന നിർമ്മിച്ച പാലം അനധികൃതമായി കൈവശപ്പെടുത്തിയ ഭൂമിയിൽ; കേന്ദ്ര സർക്കാർ

ദില്ലി: കിഴക്കൻ ലഡാക്കിലെ പാംഗോങ് (Pangong) തടാകത്തിന് കുറുകെ നിർമിക്കുന്ന (China) ചൈന പാലത്തിന്റെ നിർമാണം നിയമവിരുദ്ധമാണെന്ന് കേന്ദ്ര സർക്കാർ പാർലമെന്റിനെ അറിയിച്ചു. 1962ൽ ചൈന അനധികൃതമായി കൈയേറി കൈക്കലാക്കിയ സ്ഥലത്താണ് പുതിയ പാലം

‘പാൻഗോങ് തടാകത്തിൽ ചൈന നിർമിക്കുന്ന പാലം ഇന്ത്യൻ സർക്കാർ ശ്രദ്ധിച്ചിരിക്കുകയാണ്. 1962 മുതൽ ചൈനയുടെ അനധികൃത അധിനിവേശത്തിന് കീഴിലായിരുന്ന പ്രദേശങ്ങളിലാണ് ഈ പാലങ്ങൾ നിർമ്മിക്കുന്നത്. ഈ നിയമവിരുദ്ധമായ അധിനിവേശം ഇന്ത്യാ ഗവൺമെന്റ് ഒരിക്കലും അംഗീകരിച്ചിട്ടില്ല. ജമ്മു കശ്മീർ, ലഡാക്ക് എന്നീ കേന്ദ്രഭരണ പ്രദേശങ്ങൾ ഇന്ത്യയുടെ ആഭ്യന്തര ഭാഗമാണെന്ന് ഇന്ത്യാ ഗവൺമെന്റ് മുമ്പ് പലതവണ വ്യക്തമാക്കിയിട്ടുണ്ട്. ഇന്ത്യയുടെ പരമാധികാരത്തെയും പ്രാദേശിക അഖണ്ഡതയെയും മറ്റ് രാജ്യങ്ങൾ അംഗീകരിക്കണമെന്നും കേന്ദ്രം ആവശ്യപ്പെട്ടു. കേന്ദ്ര വിദേശകാര്യ സഹമന്ത്രി വി.മുരളീധരനാണ് ഇക്കാര്യം സഭയിൽ അറിയിച്ചത്.

കുറച്ച് കാലം മുമ്പ് ഈ പാലത്തിന്റെ നിർമ്മാണത്തെക്കുറിച്ചുള്ള ചില ഉപഗ്രഹ ഫോട്ടോകൾ ജിയോ ഇന്റലിജൻസ് വിദഗ്ദ്ധനായ ഡാമിയൻ സിമോൺ പുറത്തുവിട്ടിരുന്നു. 20 ഇന്ത്യൻ സൈനികർ കൊല്ലപ്പെട്ട ഗാൽവാൻ നദീതടത്തിലെ അക്രമാസക്തമായ ഏറ്റുമുട്ടലിന് ശേഷം – കിഴക്കൻ ലഡാക്കിൽ 50,000-ത്തിലധികം സൈനികരെ ഇന്ത്യ വിന്യസിച്ചിട്ടുണ്ട്.