ഗൾഫ് മേഖലയിലെ സംഘർഷം! കൊച്ചിയിൽ നിന്നുള്ള സർവീസുകൾ പുനഃക്രമീകരിച്ച് എയർ ഇന്ത്യ എക്സ്പ്രസ്

കൊച്ചി: ഗൾഫ് മേഖലയിൽ നിലനിൽക്കുന്ന സംഘർഷാവസ്ഥയുടെ പശ്ചാത്തലത്തിൽ കൊച്ചി അന്താരാഷ്ട്ര വിമാനത്താവളത്തിൽ നിന്നുള്ള എയർ ഇന്ത്യ എക്സ്പ്രസിന്റെ പ്രധാന സർവീസുകൾ പുനഃക്രമീകരിച്ചു. ഇന്ന് രാത്രി പുറപ്പെടേണ്ടിയിരുന്ന രണ്ട് വിമാനങ്ങളുടെ യാത്രയാണ് നാളത്തേക്ക് മാറ്റിവെച്ചിരിക്കുന്നത്. ഇന്ന് രാത്രി ഏഴ് മണിക്ക് കൊച്ചിയിൽ നിന്ന് ദോഹയിലേക്ക് തിരിക്കേണ്ടിയിരുന്ന എയർ ഇന്ത്യ എക്സ്പ്രസ് വിമാനം നാളെ പുലർച്ചെ 2:30-ന് മാത്രമേ പുറപ്പെടുകയുള്ളൂ എന്ന് എയർലൈൻ അധികൃതർ ഔദ്യോഗികമായി അറിയിച്ചു.

ഇതിനുപുറമേ ഇന്ന് രാത്രി 10 മണിക്ക് കൊച്ചിയിൽ നിന്ന് പുറപ്പെടേണ്ടിയിരുന്ന ബഹ്റൈൻ എയർ ഇന്ത്യ എക്സ്പ്രസ് വിമാനത്തിന്റെ സമയവും മാറ്റിയിട്ടുണ്ട്. ഈ വിമാനം നാളെ രാവിലെ 8 മണിക്കായിരിക്കും കൊച്ചിയിൽ നിന്ന് യാത്ര തിരിക്കുക. അതേസമയം ഇന്ന് രാത്രി 8:30-ന് കൊച്ചിയിൽ നിന്ന് പുറപ്പെടേണ്ടിയിരുന്ന എയർ ഇന്ത്യയുടെ ദമാം വിമാനം ഒന്നര മണിക്കൂർ വൈകി രാത്രി 10 മണിക്ക് പുറപ്പെടുമെന്നും അധികൃതർ വ്യക്തമാക്കി. ഗൾഫ് വ്യോമാതിർത്തിയിലെ സുരക്ഷാ സാഹചര്യങ്ങൾ മുൻനിർത്തിയാണ് ഈ അടിയന്തര സമയമാറ്റമെന്നാണ് സൂചന. വിമാനങ്ങളുടെ സമയമാറ്റം സംബന്ധിച്ച വിവരങ്ങൾ യാത്രക്കാരെ മുൻകൂട്ടി അറിയിക്കാനുള്ള നടപടികൾ സ്വീകരിച്ചിട്ടുണ്ടെന്നും എയർലൈൻ അധികൃതർ കൂട്ടിച്ചേർത്തു.