കൂനൂർ ഹെലികോപ്റ്റർ ദുരന്തം; മലയാളി സൈനികൻ പ്രദീപിന്റെ കുടുംബത്തിന് അഞ്ച് ലക്ഷം നൽകുമെന്ന് സംസ്ഥാന സർക്കാർ; നടപടി വിമർശനം ഉയർന്നതിനെത്തുടർന്ന്

തിരുവനന്തപുരം: കൂനൂർ ഹെലികോപ്റ്റർ (Coonoor Helicopter Crash) ദുരന്തത്തിൽ മരിച്ച മലയാളി സൈനികൻ പ്രദീപിന് ധനസഹായം നല്കാൻ സംസ്ഥാന സർക്കാർ. പ്രദീപിന്റെ കുടുംബത്തിന് അഞ്ച് ലക്ഷം രൂപ ധനസഹായം നൽകും. അതോടൊപ്പം അച്ഛന്റെ ചികിത്സക്കായി മൂന്ന് ലക്ഷം രൂപയും, പ്രദീപിന്റെ ഭാര്യ ശ്രീലക്ഷ്മിയ്‌ക്ക് ജോലിയും നൽകും.

അപകടത്തിൽ മരിച്ച മറ്റ് സൈനിക ഉദ്യോഗസ്ഥർക്ക് അതാത് സംസ്ഥാന സർക്കാരുകൾ വലിയ ധനസഹായം പ്രഖ്യാപിച്ചിരുന്നു. എന്നാൽ ജൂനിയർ വാറന്റ് ഓഫീസറായിരുന്ന പ്രദീപിന് കേരളം ധനസഹായം പ്രഖ്യാപിക്കാത്തതിനെതിരെ വലിയ വിമർശനം ഉയർന്നിരുന്നു. മധ്യപ്രദേശ് സ്വദേശിയായ ജിതേന്ദ്ര കുമാറിന് ഒരുകോടി രൂപ ശിവരാജ് സിംഗ് ചൗഹാനും രാജസ്ഥാൻ സ്വദേശി സ്‌ക്വാഡ്രർ ലീഡർ കുൽദീപ് സിംഗിന് ഒരു കോടി രൂപ അശോക് ഗെഹ്‌ലോട്ടും പ്രഖ്യാപിച്ചിരുന്നു.

ഉത്തർപ്രദേശ് സ്വദേശിയായ പൃഥ്വി സിംഗിന്റെ കുടുംബത്തിന് 50 ലക്ഷം രൂപയും സർക്കാർ ജോലിയും യോഗി സർക്കാരും, ആന്ധ്രാ സ്വദേശി ലാൻസ് നായിക് ബി.സായി തേജയുടെ കുടുംബത്തിന് 50 ലക്ഷം രൂപയും സർക്കാർ ജോലിയും നൽകുമെന്ന് മുഖ്യമന്ത്രി ജഗൻ മോഹൻ റെഡ്ഡിയും പ്രഖ്യാപിച്ചിരുന്നു. ഇദ്ദേഹത്തിന്റെ മക്കളുടെ പഠന ചെലവുകളും സർക്കാർ വഹിക്കുമെന്ന് പ്രഖ്യാപിച്ചിട്ടുണ്ട്.