ശബരിമലയിൽ യുവതികൾ കയറണമെന്ന് സിപിഎം കേന്ദ്ര കമ്മിറ്റി; സംസ്ഥാന ഘടകം പ്രതിസന്ധിയിൽ

ദില്ലി: ശബരിമല യുവതീ പ്രവേശന വിവാദത്തിൽ നിന്ന് തലയൂരാൻ ശ്രമിക്കുന്ന സിപിഎം കേരളം ഘടകത്തിന് പ്രതിസന്ധിയായി പാർട്ടി കേന്ദ്ര കമ്മിറ്റി. ശബരിമലയില്‍ യുവതികള്‍ക്ക് പ്രവേശനം വിശാല ബെഞ്ചിന് വിട്ടതില്‍ എതിര്‍പ്പുണ്ടെന്ന് സിപിഎം കേന്ദ്ര കമ്മിറ്റി റിപ്പോർട്ട്. യുവതികള്‍ക്കും ശബരിമലയില്‍ പ്രവേശനം സാധ്യമാക്കണമെന്ന് തന്നെയാണ് സിപിഎം നിലപാടെന്നും കേന്ദ്ര കമ്മിറ്റി അറിയിച്ചു. ശബരിമലയില്‍ യുവതീപ്രവേശനം അനുവദിക്കണമെന്ന 2018ലെ സുപ്രീംകോടതി വിധിയോട് കേന്ദ്ര കമ്മിറ്റിക്ക് യോജിപ്പാണ് ഉള്ളത്. യുവതീപ്രവേശം അനുവദിച്ച വിധിക്കെതിരായ പുനഃപരിശോധനാ ഹര്‍ജികള്‍ സുപ്രീം കോടതി തള്ളിക്കളയുകയാണു വേണ്ടിയിരുന്നതെന്നും കേന്ദ്രകമ്മിറ്റി വിലയിരുത്തി.

തിരുവനന്തപുരത്ത് കഴിഞ്ഞ മാസം ചേര്‍ന്ന കേന്ദ്ര കമ്മിറ്റി യോഗം അംഗീകരിച്ച രാഷ്ട്രീയ റിപ്പോര്‍ട്ടിലാണ് ഇക്കാര്യമുള്ളത്.
വെബ്‌സൈറ്റിലൂടെയാണ് കേന്ദ്ര കമ്മിറ്റി റിപ്പോര്‍ട്ട് സിപിഎം പുറത്തുവിട്ടത്. ശബരിമല യുവതീപ്രവേശനം അടക്കമുള്ള വിഷയങ്ങള്‍ വിശാല ബെഞ്ച് പരിഗണിക്കാനുള്ള സുപ്രീം കോടതി ഉത്തരവ് വന്നതോടെ മുന്‍ നിലപാടില്‍ നിന്നു പാര്‍ട്ടിയും സര്‍ക്കാരും പിന്നോട്ടുപോയിരുന്നു. എന്നാൽ കേന്ദ്ര കമ്മിറ്റി നിലപാടിൽ നിന്ന് പിന്നോട്ടില്ല എന്നാണ് കേന്ദ്രകമ്മിറ്റി റിപ്പോര്‍ട്ട് വ്യക്തമാക്കുന്നത്. തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പടുത്ത വേളയിൽ കേന്ദ്ര കമ്മിറ്റി നിലപാട് കേരളത്തിലെസിപിഎമ്മിന് വലിയ തലവേദനയാകും സൃഷ്ടിക്കുക.